Тошкент вилояти Оққўрғон туманида маст ҳолатда йўл-патруль хизмати инспекторининг погонини ва боди камерасини юлиб олиб, унга қаршилик кўрсатган уч нафар фуқаро 15 суткага қамалди, уларни олиб кетаётган ҳайдовчи эса жаримага тортилди. Бу ҳақда «Дарё»га Тошкент вилояти ИИББ ЙҲХБ ахборот хизмати хабар берди.
Оққўрғон туманида 2020 йилнинг 30 июнь куни соат тахминан 12:30 да хизмат олиб бораётган йўл-патруль хизмати инспекторлари текшириш учун Spark машинасини тўхтатган. Инспектор ҳайдовчи Х.Ж.нинг ҳужжатларини текшириш вақтида ундан спиртли ичимлик ҳиди келаётганлигига эътибор қилган ва уни тиббий кўрикдан ўтишга таклиф қилган.
Шу вақт автомобиль салонида бўлган уч нафар йўловчи машинадан тушиб, ЙПХ инспекторига фаол қаршилик кўрсата бошлаган. Йўловчилардан бири инспекторнинг погони ва боди камерасини юлиб олган.
Шундан сўнг, ушбу фуқаролар туман ички ишлар бўлимига олиб борилган. Юзага келган ҳолатга ойдинлик киритилиб, ҳуқуқбузарларга нисбатан тегишли тартибда маъмурий баённома расмийлаштирилган ва тўпланган ҳужжатлар мазмунан кўриб чиқиш учун туман маъмурий ишлар бўйича судига жўнатилган.
Суд жараёнида воқеа тафсилотлари атрофлича кўриб чиқилган. Ҳайдовчи Х.Ж.га жарима, унинг йўловчилари Ш.А., И.А. ва Б.А.га эса 15 сутка маъмурий қамоқ жазоси тайинланди.