Ёш олимларга Президент фармони билан ажратилган уйлар берилмаяпти. Сенат Тошкент шаҳар ҳокимидан изоҳ сўради
Шавкат Мирзиёев фармони асосида 2019 йил июль ойида ёш олимларга Сергели туманидаги кўп қаватли уйдан хонадонлар ажратилган. Бироқ уларнинг 42 нафарига уйлар ҳалигача берилмаган. Мазкур масала юзасидан изоҳ сўраб Тошкент шаҳар ҳокимига сўров юборилган.
Сенат матбуот хизмати хабарида айтилишича, 2019 йил июль ойида Президент фармони қабул қилинганидан сўнг банк ходимлари, Фанлар академияси раҳбарлари махсус комиссия ёрдамида уй-жойга муҳтож илмий ходимларни аниқлаган.
Уй-жойга муҳтож деб топилган 42 нафар ёш олим ва уларнинг оила аъзоларига 7 қаватли турар жой ажратилган. Ажратилган бинода 42 та хонадон бўлиб, улар икки ва уч хонали квартиралардан иборат. Уйларга даъвогар олимлар томонидан 2019 йилнинг ноябрь ойигача 1 миллиард 350 миллион сўмдан ортиқ пул маблағлари «Ипотека» банкининг Шайхонтоҳур тумани филиалига тўлаб берилган.
Бироқ ушбу уйлар 2020 йил январь ойида қуриб битказилган бўлса-да, ёш олимларга берилмаган.
«Мазкур масала Олий Мажлис Сенати Ёшлар, маданият ва спорт масалалари қўмитаси томонидан назоратга олинди. Шу билан бирга, қўмита томонидан ёш олимлар дуч келаётган муаммолар юзасидан изоҳ сўраб Тошкент шаҳар ҳокимига сенатор сўрови юборди.
Ҳокимлик томонидан ушбу сўровга жавоб олингандан сўнг яна батафсил маълумот берилади», — дейилади Сенат ахборот хизмати хабарида.
Эслатиб ўтамиз, 2019 йилнинг июнь ойида Тошкент шаҳар ҳокими Жаҳонгир Ортиқхўжаев Фанлар академияси Геномика ва биоинформатика маркази таянч докторантурасида таҳсил олаётган уч кишига Президент совғаси — бир хонали уйлар калитини топширганди.
