Sulton Тех Group кластери Қарши тумани ҳокимлиги билан судлашмоқда. Компания раҳбари Нурбек Эргашев туман ҳокими Мақсуда Мустафоеванинг ҳаракатларини ноқонуний деб топиш, шунингдек, тўқимачилик-кластер фаолиятини тўхтатиш ҳақидаги қарорни бекор қилишни талаб қилмоқда. Тадбиркор ушбу қарор туфайли камида 400 иш ўрнини қисқартиришга, қишлоқ хўжалиги техникаларини сотишга ва ёғ ишлаб чиқарувчи ускуналарни ҳам пуллашга мажбур бўлаётганини билдирган. «Gazeta.uz» ушбу баҳс борасидаги маълумотларни тақдим қилган.

Sulton Тех Group кластери

Фото: Президент матбуот хизмати

Sulton Тех Group хусусий корхонаси ижрочи директори Нурбек Эргашев Қарши туман маъмурий судига ўз компаниясининг пахта-тўқимачилик кластерлари рўйхатидан чиқариш бўйича қарорни бекор қилиш юзасидан шикоят аризаси билан мурожаат қилган.

Нурбек Эргашев Ўзбекистон бош вазирининг аграр ва озиқ-овқат соҳаларини ривожлантириш масалалари бўйича ўринбосари Ўктам Барноевни гарчи корхона пахта хом ашёсини етиштириш билан шуғулланса ҳам, 5,6 миллиард сўм пулни буғдой ишларига ажратмагани учун ўзига босим ўтказгани ва корхонасини пахта-тўқимачилик кластерлари рўйхатидан чиқариш билан таҳдид қилганини билдирган. Кластер билан йил охиригача шартномаси бўлган фермерларни кооперативларга ўтишга мажбурлашмоқда. Тадбиркор қиймати 100 миллион долларга тенг 15 та манфаатли лойиҳани амалга ошираётгани, аммо ушбу қарор сабаб банкрот бўлиши мумкинлигини билдирган.

Sulton Тех Group раҳбари амалдорлар устидан судга шикоят қилишга қарор қилган. Нурбек Эргашевнинг билдиришича, Қарши тумани ҳокими Мақсуда Мустафоева ўзининг ноқонуний ҳаракатлари билан тадбиркорлар манфаатларига зарар етказган ва айримларнинг фаолияти тўхтаб қолишига сабабчи бўлган.

Хусусан, бизнесмен туман ҳокими 10 апрелдаги хатида нотўғри маълумот етказгани ва бунинг оқибатида бош вазир ўринбосари Ўктам Барноев кластерни тўхтатиш ва фермерларни кооперативга ўтказиш бўйича қарор қабул қилганини айтмоқда.

Ҳокимлик хатида Sulton Тех Group’нинг сув истеъмолчилари ассосиацияси ишчиларига тўлов қилмагани ёзилган. Нурбек Эргашев компаниясининг фермер хўжаликлари билан пахта хом ашёси ва чигит хариди бўйича келишув имзолаганини таъкидлаб, фақат ушбу шартнома асосида фуқаролик-ҳуқуқий мажбуриятларга эга эканлигини маълум қилган.

«Компания аванс тўловларини ўрнатилган тартибда ўтказиб келмоқда. Фермер хўжаликлари раҳбарлари эса ўзлари мустақил равишда сув хўжалиги механизаторлари ва ишчиларига тўлов қилишни ҳал қилади», — деган у.

Қарши тумани ҳокими Мақсуда Мустафоева Вазирлар Маҳкамасига ёзган хатида кластер корхона банкдаги ҳисоб рақамини Миллий банкнинг Қашқадарё вилоят филиалида очгани ва Қарши тумани ҳисобига 2019 йилда пахта етиштиришдан тушган маблағлар етиб келмаганини ёзган.

«Туман ҳокими Мақсуда Мустафоева тадбиркорлик субъектларига қайси банкда ҳисоб рақами очишни белгилаб бериш ваколатига эга эмас», — дейилган Нурбек Эргашевнинг аризасида. Шунингдек, тадбиркор туман ҳокими ёзган хатда яна бошқа бир талай сабаб ва баҳоналар келтирилганини қўшимча қилган.

Тадбиркор суддан ушбу ноқонуний ҳаракатларга баҳо бериш ва ўзига қўйилган мазкур талабларни бекор қилиш, мансабдорга тегишли чора кўришни сўраган.

Навбатдаги суд мажлиси 25 майда ўтказилади.