«Эпидемия» фильми режиссёри Стивен Содерберг АҚШ киносаноатини қайта тиклашга киришади

Коронавирус пандемияси туфайли киносаноат жиддий зарар кўрди: бутун дунёда кинотеатрлар ёпилди, фильмлар тақдимоти қолдирилди, суратга олиниши давом этаётган фильмлар ҳам тўхтаб қолди.

Esquire’нинг ёзишича, АҚШ режиссёрлар гильдияси пандемиядан сўнг фильмлар суратга олишни қайта тиклашга ёрдам берувчи ва ишга қандай қилиб хавфсиз қайтиш мумкинлигини тушунтирувчи қўмитани тузди. Қўмита раҳбари этиб Стивен Содерберг тайинланди.

Гильдия аъзоларини қачон хавфсиз тарзда ишга қайтиши мумкинлиги қизиқтирмоқда.

«Ҳозирда кино суратга олиш жараёнлари қачон тикланишини аниқ айта олмасак-да, аммо хавфсизликни таъминлаб, ишни қайта тиклаш учун барча чораларни кўрмоқдамиз», — дейилади гильдия хабарида.

Янги қўмита етакчи эпидемиологлар билан маслаҳатлашмоқда ҳамда барча учун хавфсиз шароит яратиш учун бошқа Голливуд бирлашмалари билан ҳамкорлик қилмоқда.

Стивен Содерберг 2011 йилда ўта хавфли Хитой вируси ҳақидаги «Эпидемия» фильмини суратга олган. 2020 йилнинг март ойи охирида ушбу фильм бутун дунёдаги барча платформаларда энг кўп томоша қилинган фильм бўлди.