Путин Саудия Арабистони нефть ишлаб чиқарувчи рақобатчиларидан қутулиш учун ОПЕК+ келишувидан чиққанини айтганди. Ар-Риёд буни рад этмоқда

Россия президенти Владимир Путин Саудия Арабистони катта ҳажмда нефть ишлаб чиқарувчи рақобатчиларидан қутулиш учун ОПЕК+ келишувидан чиққанини айтганди. Саудия Арабистони ТИВ бу хабарни рад этди, дея маълум қилди Saudi Press Agency.

ТИВ хабарида айтилишича, ОПЕК+ иштирокчилари нефть ишлаб чиқариш ҳажмини қисқартиришга Россияни кўндиришга ҳаракат қилса ҳам, Москванинг ўзи келишувдан чиққан.

Аввалроқ Владимир Путин нефть нархларининг инқирозига Саудия Арабистонининг ОПЕК+ келишувидан чиққани, уларнинг нефть ишлаб чиқариш ҳажмини оширгани ва харидорлар учун чегирмалар эълон қилгани сабаб бўлган, деб айтганди. Саудия Арабистони бу йўл билан катта ҳажмда нефть ишлаб чиқарувчи рақобатчилардан қутулмоқчи бўлгани, бунинг учун нефть нархининг баррели 40 долларга тушиши кутилганини айтиб ўтган.

Шунингдек, Россия нефть ишлаб чиқарувчи бошқа мамлакатлар билан биргаликда бир сутка давомида ишлаб чиқариладиган нефть ҳажмини 10 миллион баррелгача туширишга тайёрлигини билдирган.

Эслатиб ўтамиз, 30 март куни Brent маркали нефть нархи 2002 йил ноябридан бери илк бора 23 долларидан ҳам арзонлашди. Март бошидан бери нефть нархи қарийб икки баравар пастлаган.

ОПЕК+ нефть ишлаб чиқарувчи давлатлар ўртасидаги келишув муддати март охирида якунига етган. 2020 йил 1 апрелидан Саудия Арабистони нефть ишлаб чиқариш ҳажмини кунига 12 миллион баррелгача оширди. Россия эса суткасига 11,3 миллион баррель нефть ишлаб чиқармоқда. Энг катта нефть ишлаб чиқарувчи АҚШ ҳисобланади. Мамлакатда кунига ишлаб чиқариладиган нефть ҳажми — суткасига 13 миллион баррель.