Volkswagen ва Audi ўзларининг логотиплари вақтинча ўзгарган видеони эълон қилди. Audi’нинг ҳалқалари турли томонларга «ажралган», Volkswagen’нинг V ҳамда W ҳарфлари орасида масофа пайдо бўлган. Шу орқали немис автомобилсозлик компаниялари коронавирус сабаб одамларни масофа сақлашга чақирмоқда, деб хабар беради Motor.

Фото: Audi

Коронавирус пандемияси автомобиль саноатига ҳам жиддий зарар етказяпти. Жаҳон бўйича машиналар савдоси, ишлаб чиқариш тўхтаб қолган. Автомобиль ишлаб чиқарувчи компаниялар Хитой коронавирусига қарши курашга қўлдан келганча ўз ҳиссаларини қўшмоқда: қайсидир компания ўз биноларини вақтинча госпитал сифатида фойдаланишни таклиф этаётган бўлса, бошқалар миллионлаб пулларни хайрия қилмоқда, яна бир қисми тиббиёт қурилмаларини ишлаб чиқаришни йўлга қўйган.

Audi ва Volkswagen эса ўз навбатида инсонларни ижтимоий масъулиятга чақириш йўлини ўйлаб топди. Улар вақтинчалик ўз эмблемаларини ўзгартириб, янги логотипларини ижтимоий тармоқларга жойлаштирди. Икки метр оралиқ COVID-19 коронавирусини юқтириб олмасликка ёрдам беради.