Самарқандда кўчада яланғоч юрган эркаклар жазоланди

Ижтимоий тармоқларда Самарқанд шаҳри кўчаларида кийимсиз юрган эркакларнинг видеоси тарқалганди. «Дарё» мухбири Фарҳод Норбўтаевнинг хабар беришича, видеодаги эркаклар шахси аниқланди ва улар майда безорилик содир этганликда айбли деб топилиб, маъмурий қамоқ жазосига ҳукм қилинди.

Маълум бўлишича, 29 февраль, шанба куни, соат тахминан 23:00 атрофида Жомбой туманида туғилган фуқаролар Самарқанд шаҳридаги Туркистон ҳамда Амир Темур кўчалари кесишмасида яланғоч ҳолда юрган. 1 март, якшанба куни, соат 00:30 да Самарқанд шаҳар ИИО ФМБ ходимлари томонидан навбатчилик қисмига келтирилган фуқаролар шахсига аниқлик киритилган. Айтилишича, шаҳар кўчасида юриб, майда безорилик содир этган шахслар 1976 йил Жомбой туманида туғилган Ж.Н., 1992 йилда туғилган Ў.Т. эканлиги аниқланган. Шунингдек, 1979 йилда туғилган жомбойлик Х.Д. уларни ўз автомашинасига миндирган.

Фуқаро Ж.Н. «Дарё» мухбири билан суҳбати давомида 29 февраль куни ҳамқишлоғи Ў.Т. билан спиртли ичимлик истеъмол қилганини айтиб, кўчада нима қилганини англамаганини таъкидламоқда.

— Спиртли ичимлик ичиб, ўзимиз билмаган ҳолда Самарқанд шаҳрида ҳамқишлоғим билан шу ишни қилганмиз. Биз жуда кўп ичганмиз. Ўзимиз ҳам нима иш қилганлигимизни билмаганмиз. Аввал қишлоқда, сўнг шаҳарга келиб яна ичганмиз. Аммо шаҳарнинг қаерида ичганлигимизни ҳам эслай олмайман. Ҳатто шаҳарга қандай келганимни билмайман. Каллам «кантюжен» бўлиб қолган эди (Жойида эмас демоқчи, таҳририят). Нима қилаётганлигимизни билмаганмиз. «Запис» умуман ишламаган, — дейди Ж.Н. — Бизлар икки киши эдик. Ҳеч қандай гаров ўйнамаганмиз. Бу ерда пул ўйналмаган. Нима иш қилганимизни ўзимиз билмаганмиз. Бизни олиб кетмоқчи бўлган ҳайдовчининг гапига қулоқ солмасдан тентаклик қилганмиз. Мен Ўзбекистон халқидан кечиришларини сўрайман. Қилган ишимдан пушаймонман.

Воқеанинг яна бир иштирокчиси Ў.Т.нинг таъкидлашича, у ҳамқишлоғи Ж.Н. билан дастлаб Жомбой туманидаги Журият қишлоғида жойлашган ошхонада кўп миқдорда спиртли ичимлик истеъмол қилган. Сўнг Самарқанд шаҳридаги Сартепа массивига келиб, бу ерда ҳам ичишни давом эттирган. Кеч соат тахминан 23:00 атрофида Ж.Н. билан Сартепа массивида яланғоч ҳолатда юрган.

— Шаҳарнинг қаерида спиртли ичимлик ичганимизни эслолмайман. Гаров ўйнамаганмиз, маст ҳолатда шу ишни қилганмиз. Кўчада яланғоч юрганимни ўзим билмайман. Фақат видеода кўрдим. Биз маст бўлиб қолгандик. Олиб кетиш учун ҳайдовчини чақиртиргандик. Қолганини эслай олмайман, — дейди Ў.Т. — Қилган ишимдан пушаймонман. Ўзбекистон халқидан қилган ишим учун чин кўнгилдан кечирим сўрайман.

Ҳолат юзасидан ўзининг машинасида икки нафар яланғоч фуқарони миндирган, кейинчалик оломон қуршовида қолган ҳайдовчи Х.Д. билан суҳбат жараёнида у ҳамқишлоқлари Ж.Н. ва Ў.Т. соат 23:00 атрофида қўнғироқ қилиб, Самарқанд шаҳридан олиб кетишини сўраганлигини билдирди.

— Мен уларни олиб кетишга келгандим. Улар маст ҳолатда эди. Машинамда олиб кетаман деган пайтимда улар кийимларини ечиб, бу светофордан кейинги светофоргача яланғоч ҳолатда борамиз дейишди, — дейди Х.Д. — Мен уларни қайтаришга ҳаракат қилдим. Аммо менинг гапимга қулоқ солмади. Иккаласига кучим етмади. Улар кейинги светофорнинг олдидан олиб кетасан дейишди. Светофор тагига келганимда иккаласи машинага минди. Шу вақтда бошқа ҳайдовчилар келиб бизни тўхтатишди. Мен бу қилган ишимдан пушаймонман. Мен уларни қайтара олмаганим учун бутун Ўзбекистон халқидан кечирим сўрайман.

Самарқанд вилоят ИИБ ахборот хизмати раҳбари Жаҳонгир Сагдуллаевнинг маълум қилишича, Самарқанд шаҳар Маъмурий ишлар бўйича судининг 2020 йил 2 март кунидаги қарорига асосан, Маъмурий жавобгарлик тўғрисидаги кодекснинг 183-моддаси (Майда безорилик)да кўрсатилган ҳуқуқбузарликни содир этганликлари учун фуқаро Ж.Н.га 15 сутка муддатга, фуқаро Ў.Т.га 15 сутка муддатга, фуқаро Х.Д.га 10 сутка муддатга маъмурий қамоқ жазоси тайинланди.