Америка ҳукумати Япониядаги Йокогама портида коронавирус сабаб карантинда турган Diamond Princess саёҳат кемасидан ўз фуқароларини эвакуация қилишга тайёрланмоқда. Бу ҳақда Касалликлар профилактикаси ва уларни назорат қилиш марказининг расмий вакили Генри Уолкка таяниб, The Wall Street Journal хабар берди.

Фото: The New York Times

Маълумотларга кўра, кема ичида 380 га яқин АҚШ фуқароси бўлиб, улар Япониядан иккита самолётда олиб кетилади. Улар 16 февраль, якшанба куни, Америкага етиб келиши керак.

Америкалик шифокорлар фуқароларнинг аҳволини текширувдан ўтказади. Йўтали бор, тана ҳарорати юқори ва инфекциянинг бошқа аломатлари кузатилган фуқаролар авиарейсга чиқарилмайди.

Тахминларга кўра, эвакуация қилинган АҚШ фуқаролари Калифорния штати яқинида Тревис авиабазасига жойлаштирилади. У ерда фуқаролар қўшимча текширувдан ўтказилиб, икки ҳафталик карантинга жойлаштирилади.

Сўнгги маълумотларга кўра, Diamond Princess саёҳат кемасида коронавирус билан касалланганлар сони 218 кишини ташкил этмоқда. Аввалроқ кемада тўрт нафар Қозоғистон фуқароси ҳам борлиги маълум қилинганди.

Эслатиб ўтамиз, Diamond Princess саёҳат кемаси жорий йилнинг 20 январь куни Йокогамадан чиқиб, Кагосима—Гонконг—Окинава йўналишидан ўтиб, 3 февраль куни қайтиб келган. Бу вақтга келиб кемадаги бир неча киши тоби қочгани ҳақида хабар қилган ва ҳукумат бортдаги барчани текширувдан ўтказишга қарор қилган. 11 февраль куни саёҳат кемасидаги кексалар ва сурункали касалликларга эга беморларни соҳилга эвакуация қилиш бошлаган эди.