Санъаткорларни ҳар қандай воқеа ёки буюм, белги илҳомлантириши мумкин, ҳатто ўзга ижодкорларнинг асарлари ҳам. Польшалик архитектор Карина Вичак машҳур логотиплардан илҳомланиб ўзига хос уйлар комплексини яратди. Каринанинг ғояси асосида Mitsubishi, Renault, Chevrolet ва Adidas логотипларига ўхшаш уйлар қад ростлади, хонадонларнинг ичкариси меҳмонхона, ётоқхона ва ювиниш хоналарига эга одатий уйлардагидек жиҳозланган. Ҳар бир хона логотип ғоясига ҳамоҳанг!
Биринчи бино Trihouse номини олган — у Adidas логотипи шаклида.
Trihouse шиша девор ва томлар ажратиб турадиган учта бетон қисмдан иборат. Бинонинг шакли учбурчакни эслатади ва умумий майдони 560 квадрат метрга тенг.
Уй тўрт қаватдан иборат — дастлабки икки қаватда ошхона, овқатланиш хонаси, меҳмонхона, кутубхона ва бошқа хоналар жойлашган. Учинчи ва тўртинчи қаватларда ётоқхона ва ювиниш хоналари мавжуд.
Иккинчи бино Crosshouse деб аталади. У Chevrolet логотипи шаклида.
Каринанинг ғояси бўйича уй сувда жойлашган ва хоч шаклида. Бинонинг ташқи томони шиша билан ўралган. Умумий майдони 245 квадрат метрни ташкил қилади, ушбу ҳудудга иккита қават ва мезонин киради. Ошхона, овқатланиш зали ва меҳмонхона шиша деворлар билан ўралган қисмига яқин жойлашган, ётоқхона ва ювиниш хонаси бинонинг қарама-қарши томонида.
Учинчи бино Pyrahouse деб номланган ва Mitsubishi логотипини эслатувчи ромб шаклида.
Уйнинг қуйи қисми 320 квадрат метр майдонга эга ва бетондан қурилган, кираверишдаги зина чордоқ ва кичик йўлакка бошлайди. Биринчи қаватда меҳмонхона, ошхона, овқатланиш хонаси ва кутубхона жойлашган. Пирамиданинг юқори қисмида ётоқхона ва ювиниш хонаси бор.
Rhombhouse уйчаси Renault логотипи шаклида қурилган.
Архитектор бинони ромб шаклида қуришни таклиф этган, марказда иккала томонни ҳам шаффоф кўрсатадиган шиша деворлар ўраган. Ошхона, меҳмонхона ва кутубхона биринчи қаватда, ётоқхона, ювиниш хонаси ва гардероб иккинчи, қўшимча ётоқхона, кабинет ва яна иккита ваннахонаси учинчи қаватда жойлашган. Уйнинг умумий майдони 270 квадрат метрни ташкил қилади.
Изоҳ (0)