Хоразмннг «Лазги» рақси Инсоният номоддий мероси репрезентатив рўйхатига Ўзбекистон маданий меросининг таркибий қисми сифатида киритилди. Бу ҳақда Бош вазир ўринбосари Азиз Абдуҳакимов маълум қилди.

Фото: Азиз Абдуҳакимов

Бу ҳақдаги қарор Колумбиянинг Богота шаҳрида 12 декабрь куни UNESCOнинг номоддий меросни асраш ҳукуматлараро қўмитаси 14-сессияси давомида қабул қилинган.

Ўзбекистоннинг UNESCOдаги элчиси Умид Шодиев бошчилигидаги делегация томонидан сессия иштирокчилари учун «Лазги» номинацияси тақдимоти ўтказилган.

Ушбу мажлисда Ўзбекистон томони мазкур рўйхатга бахшичилик санъати ва этник спорт турларини киритиш учун ҳам ҳаракат бошланганини расман маълум қилинган.

Маълумот учун, бугунги кунга қадар UNESCOнинг Инсоният номоддий мероси репрезентатив рўйхатига «Шашмақом» ва Бойсун маданий муҳити (2008), катта ашула (2009), аския (2014), палов ва Наврўз байрами (2016) киритилган эди.