Олий суд жиноият ишлари судларининг фаолияти ҳақида маълумот берди
Шу йилнинг 9 ойи мобайнида жиноят ишлари бўйича судлар томонидан 26 859 нафар шахсга нисбатан 20 627 та иш кўриб чиқилган, деб хабар беради Олий суд матбуот хизмати.
Кўрсаткичлар 2018 йилга нисбатан шахслар бўйича 27,2 фоизга, ишлар бўйича эса 28,2 фоизга камайган. Жумладан, 576 нафар шахс оқланган ва реабилитация қилинган. Судланган шахслар сони 20818 нафарни ташкил этиб, шундан 5 300 нафар шахсга озодликдан маҳрум қилиш ва 14 482 нафарига бошқа турдаги жазолар тайинланиб, 1 036 шахсга шартли ҳукм қилинган.
Таъкидланишича, судланганларнинг 18 429 нафари эркак, 2 389 нафари аёл, 8 036 нафари ёшлар (378 нафари вояга етмаганлар) ва 674 нафари 60 ёшдан ошган шахслар.
«2306 нафар шахс озодликдан маҳрум этиш билан боғлиқ бўлмаган жазолар тайинланиши муносабати билан суд залидан озод қилинган, 19 667 нафари жазони ўташ муддатидан илгари шартли озод қилинган, 6 041 нафарига тайинланган жазоси енгили билан алмаштирилган ва 5 116 нафар шахсга нисбатан дастлабки тергов органлари томонидан асоссиз равишда қўйилган моддалар айбловдан чиқариб ташланган ёки қайта малакаланган», — дейилади хабарда.
Шунингдек, 202 нафар шахсга Ёшлар иттифоқи, 175 нафар аёлга Хотин-қизлар қўмитаси ва 1078 нафар шахсга маҳалла фуқаролар йиғини кафолат хати асосида озодликдан маҳрум қилиш билан боғлиқ бўлмаган жазолар тайинланган.
2018 йилнинг шу даврига нисбатан айрим жиноят турлари учун судланганлик кўрсаткичлари камайган. Бундан ташқари, ҳисобот даврида ярашув институтининг самарали қўлланилиши натижасида 4 613 нафар шахс жиноий жавобгарликдан озод этилган. Етказилган 362,2 миллиард сўмдан зиёд моддий зарарнинг ўрнини қоплаган 2 327 нафар шахсга озодликдан маҳрум қилиш билан боғлиқ бўлмаган жазо тайинланган.
Қўшимча қилинишича, Олий суд жиноят ишлари бўйича судлов ҳайъати томонидан назорат тартибида 1355 шахсга нисбатан 1 094 та иш кўриб чиқилган, 812 шахсга нисбатан қуйи судлар томонидан чиқарилган қарорлар бекор қилинган ва 403 нафар шахсга нисбатан чиқарилган суд қарорлари ўзгартирилган.
