Ўзбекистонда 2019 йилнинг тўққиз ойи давомида миллий валютанинг чет эл валютасига нисбатан курси ички валюта бозорида мавжуд талаб ва таклифдан келиб чиқиб 13 % га пасайди. Ушбу давр мобайнида валюта курсининг минимал ва максимал кўрсаткичи бир доллар учун мос равишда 8334 сўм ва 9457 сўмни ташкил этган. Бу ҳақда Марказий банкнинг мазкур даврда ички валюта бозорида юридик ва жисмоний шахслар томонидан амалга оширилган валюта олди-сотди операциялари бўйича эълон қилинган шарҳида сўз борган.

Фото: Google Images

Марказий банк томонидан маълум қилинишича, жорий йилнинг август ойида амалга оширилган чора-тадбирлар натижасида алмашув курсининг янги бозор шароитларига мослаштирилишидан сўнг сентябрь—октябрь ойларида валюта биржасида алмашув курси динамикасининг барқарорлиги кузатилиб, макроиқтисодий шароит ва омилларни инобатга олган ҳолда йил якунига қадар кескин ўзгариши кутилмаяпти.

Ўтган даврда юридик ва жисмоний шахслар томонидан амалга оширилган валюта олди-сотди операцияларининг жами айланма ҳажми 24,3 миллиард долларни ташкил этиб, ўтган йилнинг мос давридаги кўрсаткичга нисбатан 1,3 баробарга ошган.

Валюта биржасининг банклараро савдо сессияларида амалга оширилган валюта олди-сотди операцияларнинг ҳажми 15,5 миллиард долларни ташкил этиб, бундан жами талаб 7,7 миллиард долларга, таклиф эса 4,8 миллиард долларга тенг бўлган.

Юқорида келтирилган талаб ва таклиф ўртасидаги 2,9 миллиард доллар миқдоридаги тафовут Марказий банкнинг соф интервенсиялари ҳисобига, йил бошидан маҳаллий ишлаб чиқарувчилардан сотиб олинган 3 миллиард доллар монетар олтин ҳажми доирасида қопланган. Бу ўз навбатида, пул-кредит сиёсатидан келиб чиқиб, иқтисодиётга қўшимча киритилган ликвидликни стерилизация қилиш имконини яратган.

Биржадан ташқари валюта бозорида тижорат банклари томонидан амалга оширилган валюта олди-сотди операцияларининг жами ҳажми 5,2 миллиард долларга тенг бўлди. Бунда тижорат банклари юридик шахслардан 3 миллиард доллар миқдорида валюта маблағлари сотиб олиб, ўз навбатида уларга 2,2 миллиард доллар миқдорида валюта маблағлари сотилган.

Жорий йилнинг тўққиз ойи давомида валюта айирбошлаш шохобчалари орқали тижорат банклари билан аҳоли ўртасида амалга оширилган нақд ва нақдсиз шаклдаги валюта олди-сотди операцияларининг жами ҳажми 3,6 миллиард долларга етган. Бунда аҳолидан сотиб олинган валюта маблағлари 2,5 миллиард долларни, аксинча уларга сотилган валюта миқдори 1 миллиард долларни ташкил этган. Тижорат банкларининг аҳоли билан валюта олди-сотди операциялари ҳажми ўтган йилнинг шу даврига нисбатан 1,4 баробарга ошган.

Шунингдек, жорий йил январь—сентябрь ойлари давомида аҳоли томонидан амалга оширилган пул ўтказмалари жами айланма ҳажми 5,2 миллиард долларни ташкил этиб, бундан 4,5 миллиард доллар валюта маблағлари республикага халқаро пул ўтказмалар тизими орқали кириб келган бўлса, 0,8 миллиард доллар аҳоли томонидан чет эл мамлакатларига юборилган. Халқаро пул ўтказмалари орқали республикага кириб келган валюта маблағлар ҳажми ўтган йилнинг шу даврига нисбатан 18 % га ошган.