Ижтимоий тармоқларда Чимкентдаги Академик-инновацион университетда таҳсил олаётган ўзбекистонлик талабалар маҳаллий аҳолининг тазйиқига учраётгани ҳақида мурожаат пайдо бўлганди. Ушбу хабарлар юзасидан Ўзбекистон Ташқи ишлар вазирлиги Консуллик-ҳуқуқий департаменти баёнот берди.
Мавзуга доир: Чимкентда ўзбекистонлик талабалар маҳаллий ёшлар томонидан калтакланаётгани хабар қилинди
ТИВ хабарида таъкидланишича, йиғилишда Чимкентда таълим олаётган Ўзбекистон фуқароларининг хавфсизлигини таъминлаш, қоидабузарларга қонуний чоралар кўриш ва келажакда нохуш ҳодисаларнинг олдини олиш учун зарур профилактика тадбирларини ўтказиш борасида кўриладиган чоралар муҳокама қилинган.
Ўзбекистоннинг Қозоғистондаги элчихонаси ва Олмаотадаги Бош консулхонаси (Чимкент унинг консуллик округига киради) вазиятни назоратга олган. ТИВнинг топшириғига биноан Бош консулхона вакиллари Чимкентда бўлиб турибди, ҳудуд ва университет раҳбариятлари, ўзбекистонлик талабалар билан алоқа ўрнатилган. Ўзбекистондан борган талабаларга уларнинг дипломатик ваколатхона ҳимоясида эканлиги тушунтирилган.
Қайд этилишича, барча мавжуд муаммолар Чимкент шаҳри маҳаллий ҳокимияти билан биргаликда ҳал қилинади. Маҳаллий ҳокимият дипломатик ваколатхона фаолиятига ҳар томонлама ёрдам кўрсатмоқда.
Консуллик-ҳуқуқий департаменти Қозоғистоннинг Олмаота ва Чимкент шаҳарлари, Олмаота, Шарқий Қозоғистон, Туркистон, Жамбил ва Қизилўрда вилоятлари ҳудудида бўлиб турган Ўзбекистон фуқаролари зарур ҳолларда мамлакатнинг Олмаота шаҳридаги Бош консулхонасига қуйидаги телефон рақамлари орқали мурожаат қилишлари мумкинлигини эслатган: +7-727-299-20-70, +7-727-390-26-16.
Изоҳ (0)