Ижтимоий тармоқларда Зарафшондаги 2-мактабнинг бошланғич синфларидан бирида олинган сурат тарқалди. Унда мактаб формасидаги болалар китоб ва дафтарларини очиб, полда ўтирганини кўриш мумкин. «Маълумотларга кўра, ўқувчилар 3 сентябрдан то ҳозирги кунгача шу ҳолатда дарс қилмоқда», — деб хабар бермоқда Repost нашри Telegram’даги @navoi_navoiy каналига асосланиб.

Фото: Telegram / @navoi_navoiy

Навоий вилояти ҳокимлиги «Дарё»га суратдаги ҳолат 3 сентябрь куни — 2-мактабга 4-синф ўқувчилари китобларни олишга келган ва китобларни сумкаларни жойлаштираётган вақтда олинганини, ўқув йили бошланган 4 сентябрда хоналар тўлиқ парталар билан таъминланганини билдирди.

Фото: Навоий вилояти ҳокимлиги матбуот хизмати

Навоий вилояти халқ таълими бошқармаси бошлиғи Н.Улуғбердиевнинг «Дарё»га тақдим этилган ахборотида ҳам ушбу таъкид такрорланган:

«Ижтимоий каналда чоп этилган фотолавҳа 2-умумий ўрта таълим мактаби 4-синф ўқувчилари бўлиб, ҳолат 3 сентябрь куни ўқувчилар китобларини олишга келган ва китобларини сумкаларига жойлаштириш жараёни бўлган.

...Мазкур мактабнинг янги қурилган қўшимча биноси 3 сентябрнинг иккинчи ярмида вақтинчалик (янги ўқув жиҳозлари етказиб берилгунига қадар) Зарафшон шаҳрида жойлашган, бугунги кунда фаолияти тўхтатилган касб-ҳунар коллежлардан етарлича парта, стол ва доскалар билан таъминланди. Мактабда ўқув жараёнлари 4 сентябрь куни тўлиқ жиҳозланган ҳолда бошланди.

Юқоридагиларга асосан вилоят халқ таълими бошқармаси Зарафшон шаҳар 2-умумтаълим мактаби янги қурилган қўшимча ўқув биносига жиҳозлар етишмаслиги юзасидан юборилган мурожаатни асоссиз деб ҳисоблайди».

Ўз навбатида @navoi_navoiy канали муаллифлари эса воқеа 3 сентябрь, дам олиш кунида эмас, балки ўқиш бошланган кунларда юз берганини таъкидламоқда.

Биринчидан, бу суратни юборган одам ўқувчилар бир неча кун шундай ўқиганини айтган. Иккинчидан, болалар китоб олгани борган бўлса, нега уларнинг олдида дафтар ва ручка ҳам бор? Олдиларида китоб кўрмадим, фақат кундаликни кўрдим. Учинчидан, нега улар дам олиш куни формада? Мактабдан китоб олиш учун формада бориладими? Тўртинчидан, фарзандингизни бирор марта дам олиш куни формада мактабга юбориб, китоб олдиртирганмисиз?

Бошқа фактларни алоҳида расм қилиб каналга ташлайман. Тўғри, ўзимни 100 фоиз ҳақ дея олмайман, лекин юқорида келтирганларим асосли.