Ўзбекистон ва Беларусь форуми икки кундан буён давом этмоқда. Айни дамда имзоланган шартномаларнинг умумий қиймати 500 миллион долларга етди, деб хабар берди Sputnik.
Дори-дармонлар
Беларуснинг «Белфармпром» холдинги ҳамда Ўзбекистон тиббиёт вазирлигининг Фармацевтика соҳасини ривожлантириш агентлиги ва «Фагусал» МЧЖ ўзаро ҳамкорлик ҳақида шартномалар имзолади. Шартномага мувофиқ, Ўзбекистон ва Беларусь ҳамкорлигида қўшма корхона ташкил қилинади
«Белфармпром» директори Виктор Шеин айтишига қараганда, биргаликда ишлаб чиқарилган дори воситалари учинчи мамлакатларга экспорт қилиниши режалаштирилган, жумладан Афғонистонга ҳам.
«Лойиҳанинг қизиқ томони шундаки, янги қурилаётган майдончада Беларуснинг барча корхоналари маҳсулотларини ишлаб чиқариш йўлга қўйилади. Ушбу корхоналар ҳозир ўз дориларини Ўзбекистонга тўғридан-тўғри етказиб бермоқда», - дейди «Белфармпром» директори.
Шунингдек, икки республика Тошкент вилоятида қишлоқ хўжалиги соҳасини ривожлантириш мақсадида селексия-генетик марказ ҳамда ветеринария учун фармацевтик корхона ташкил қилиш ҳақида келишиб олди.
Картошка ва сут фермалари
Ўзбекистон – иқлими иссиқ ва ерлари унумдор мамлакат. Шу сабабдан ҳам қишлоқ хўжалиги соҳасида ҳамкорлик қилишга қизиқиш катта.
Ундан ташқари Ўзбекистон ҳам Беларусни қишлоқ хўжалиги соҳасида ҳамкорликни ривожлантиришда ўзининг етакчи ҳамкорларидан бири деб ҳисоблайди.
«Биз беларуслик ҳамкорларимиз муваффақиятларини катта қизиқиш билан кузатиб борамиз. Қишлоқ хўжалигида ҳамкорликни ривожлантириш - ушбу форум натижаларидан бири бўлади деб умид қиламиз», – деди ўзбекистонлик сенатор Алишер Курманов.
Курманов Беларусь билан ҳамкорликда картошканинг қурғоқчиликка чидамли, серҳосил навларини яратишдан умид қилмоқда.
Ундан ташқари Тошкент вилоятида Беларусь технологиялари асосида сут-товар мажмуаси қуриш режалаштирилган. Ушбу лойиҳани амалга оширишда Ўзбекистонга «Здравушка-милк» компанияси ёрдам беради.
Шунингдек, Беларусь Ўзбекистонга катта миқдорда шакар, сут маҳсулотлари, парранда ва мол гўшти етказиб беришга тайёр.
Катта ва стратегик режалар
Ўзбекистон бош вазири ўринбосари Элёр Ғаниев икки республика ҳамкорлигидан умидлари катталигини маълум қилди.
«Икки давлат раҳбарлари олдимизга ўзаро маҳсулот айрбошлаш ҳажмини 1 миллиард долларга етказиш вазифасини қўйди. Биз ушбу йил охиригача ўзаро савдо ҳажми 500 миллион долларга етказишни кутмоқдамиз», - деди Элёр Ғаниев Беларусь телеканали эфирида.
Беларусь Республика кенгаши спикери Михаил Мясникович ҳам Беларусь Ўзбекистонни Марказий Осиёда муҳим ва истиқбоблли ҳамкор сифатида қабул қилаётганини ва президент ўзаро савдони 1 миллиард долларга етказишни талаб қилаётганини хабар қилди. Беларусь парламенти етакчиси ушбу фаолият тизимли равишда олиб борилса, Тошкент ва Минск ушбу кўрсатгичга етиши осон бўлишини айтиб ўтди.
Эслатиб ўтамиз, Шавкат Мирзиёев бугун, 31 июль куни Беларусга давлат ташрифи билан боради. Икки давлат раҳбарлари имзоси учун бир неча ўнлаб ҳужжатлар тайёрдаб қўйилган. Икки республика раҳбарлари учрашуви муносабатлар ривожланиши учун катта туртки бўлиши кутилмоқда.
Изоҳ (0)