Хитой Халқ Республикасининг хорижий корхоналарни ривожлантириш бўйича Хитой ассоциацияси (CODA) бош котиби Хэ Чжэнвэй бошчилигидаги ишбилармон доира вакилларидан иборат делегация Самарқанд шаҳрига келди. Бу ҳақда ЎзА маълум қилди.
Самарқанд вилояти ҳокимлигида ўтказилган учрашувда вилоят ҳокими Эркинжон Турдимов меҳмонларни ташриф билан қутлаб, вилоятда туризм, қишлоқ хўжалиги, қурилиш материаллари ишлаб чиқариш, чиқиндини қайта ишлаш ва бошқа соҳаларда ҳамкорлик қилиш учун кенг имкониятлар мавжудлиги ҳақида сўз юритди.
Шундан сўнг вилоятнинг инвестицион салоҳияти, хорижлик ҳамкорлар учун яратилган имконият ва қулайликларга оид, шунингдек, амалга оширилиши режалаштирилаётган лойиҳалар тақдимоти ўтказилди.
Меҳмонларга вилоятнинг иқтисодий имкониятлари, транспорт-логистика тармоғи, коммуникация тизимлари ҳақида маълумот берилди.
– Самарқанд бой тарихга эга шаҳар ва биз бу ерга келганимиздан жуда хурсандмиз, – дейди хорижий корхоналарни ривожлантириш бўйича Хитой ассоциацияси (CODA) бош котиби Хэ Чжэнвэй. – Кейинги йилларда бизнинг тадбиркорларда Ўзбекистонга, бу ерда бизнес фаолиятни йўлга қўйишга қизиқиш ортиб бормоқда. Бугунги тақдимотлар, бизга берилган маълумотлардан сўнг ҳамкорликда ишлашга иштиёқимиз ошди. Айни пайтда Ўзбекистонда инвестиция киритиш, юртингиз тадбиркорлари билан қўшма корхоналар ташкил этиш учун қулай муҳит яратилган.
Изоҳ (0)