Ўзбекистонда охирги 30 йил мобайнида аҳолини рўйхатга олиш ўтказилмади. Бу ҳақда Президентнинг ижтимоий-иқтисодий масалалар бўйича маслаҳатчиси Вячеслав Голишев маълум қилди, дея хабар беради Sputnik.
«Биз бу ишнинг йўл-йўриғини йўқотдик. Ундан ташқари, ўтган вақт мобайнида шарт-шароит, услублар, кўлам ўзгарди. Агар 30 йил аввал республиканинг доимий аҳолиси 20 миллион атрофида бўлса, ҳозир 32 миллиондан ошиб кетди», — деди Голишев.
Бу борадаги ўзига хос жиҳатлар ва муаммоларга тўхталар экан, Президент маслаҳатчиси миграциянинг юқори даражаси ва аҳолининг катта қисмида етарли тушунча мавжуд эмаслигини келтириб ўтди.
«Хорижга ишлашга кетганларнинг даромадларини анъанавий статистика маълумотларида қандай акс эттиришни ўйлаш керак. Аҳоли муносабатига келсак, жойларда жуда катта кўламда тушунтириш ишларини олиб бориш зарур. Ҳамма ҳам уйига рўйхатга олувчи келиб, оила таркиби, даромадлари миқдори ва бошқа шахсий саволларни беришига тайёр эмас. Одамларга бу нима учун кераклигини тушунтириш керак», — таъкидлади Голишев.
Изоҳ (0)