Андижон вилояти Адлия бошқармаси ташаббуси билан Қўрғонтепа туман маданият ва истироҳат боғида «Фуқаролар давлат органларига эмас, давлат органлари фуқароларга хизмат қилиши керак!» шиори остида «Адлия сайли» ҳуқуқий тарғибот ва маърифат тадбири ташкил этилди. Бу ҳақда «Дарё» мухбири хабар бермоқда.
Унда вилоят ҳокимлиги, прокуратура, жиноят, фуқаролик, маъмурий ва иқтисодий судлар, Давлат хизматлари маркази, халқ таълими, мактабгача таълим, Адвокатлар палатаси Андижон вилоят ҳудудий бошқармаси, ФҲДЁ бўлимлари, олий таълим муассасалари ҳамда ҳудуддаги барча давлат органлари ва ташкилотларнинг масъул ходимлари иштирок этди.
Тадбирда асосий эътибор никоҳ шартномасининг аҳамияти, мерос ҳамда васиятнома бўйича фуқароларга тушунчалар беришга қаратилди. Шунингдек, иштирокчиларга Адлия вазирлигининг «Ҳуқуқий ахборот» Telegram канали, вазирлик томонидан онлайн-маслаҳатчи хизмати орқали аҳолига бепул ҳуқуқий маслаҳатлар бериш мақсадида ташкил этилган ADVICE.UZ ҳуқуқий ахборот порталининг имкониятлари, қулайлик ҳамда афзалликлари ҳақида батафсил маълумотлар берилди.
3 минг нафардан зиёд аҳоли вакиллари қатнашган тадбирда иштирокчиларга 15 турдаги 3500 нусхадан ортиқ буклет ва флаерлар тарқатилди.
Сайлда аҳоли саломатлиги ҳам эътибордан четда қолмади. 89 нафар фуқаролар бепул тиббий кўрикдан ўтказилиб, 36 нафарига амбулатор шароитда даволаниш учун тавсиялар, 3 нафарига эса стационар даволаниш бўйича Андижон вилоят кўп тармоқли тиббиёт марказига имтиёзли йўлланмалар берилди. 2 нафар ижтимоий ҳимояга муҳтож фуқарога ногиронлик аравачаси ҳамда эшитиш мосламаси топширилди.
Тадбирда аҳолининг маданий ҳордиқ чиқаришлари учун концерт дастурлари, турли хилдаги кўнгилочар ўйинлар, ҳунармандлар томонидан тайёрланган маҳсулотлар кўргазмалари, ёшлар ўртасида ҳуқуқий билимлар беллашуви мусобақалари ҳамда ёш спортчиларнинг чиқишлари намойиш этилди. Рус, уйғур ва қирғиз миллий маданий марказлари ҳам кўргазмали чиқишлари билан фаол қатнашди. Моҳир ошпазлар иштирокида «Энг яхши Андижонча ош» танлови ҳам ўтказилди. Аҳоли учун арзон нархларда қишлоқ хўжалиги маҳсулотлари, сайёр китоб савдолари ва меҳнат ярмакалари ташкил қилинди. 60 нафар фуқаро доимий иш ўрнига эга бўлди.
Изоҳ (0)