Жорий йилнинг 16 апрель куни ижтимоий тармоқда Каттақўрғон шаҳридаги маҳаллалардан бирининг раиси билан аҳоли ўртасида келишмовчилик юзага келгани ҳақида видео тарқалди, бу ҳақда Самарқанд вилояти ҳокимлиги ахборот хизмати маълумотига таяниб Zarnews хабар қилади.
Каттақўрғон шаҳридаги Амир Темур маҳалла фуқаролар йиғини раиси Зокиржон Раимов кечки пайт маст ҳолатда ўз маҳалласидаги фуқаролар билан жанжаллашиб, уларни қўпол сўзлар билан ҳақорат қилган. Ишдан сўнг у бошқа инсонлар каби эркин бўлишини пеш қилиб одоб-аҳлоқ қоидаларини қўпол равишда бузган ва номуносиб хатти-ҳаракатларни содир этган.
Ушбу ҳолат юзасидан фуқароларнинг мурожаатлари асосида маҳалла раисига нисбатан тегишли чора кўрилди.
Каттақўрғон туман маъмурий судининг қарорига кўра, Зокиржон Раимовга Ўзбекистон Республикаси Маъмурий жавобгарлик тўғрисидаги кодексининг тегишли моддалари билан энг кам иш ҳақининг 10 (ўн) баравари миқдорида, яъни 2 027 300 (икки миллион йигирма етти минг уч юз) сўм жарима жазоси тайинланди. Бундан ташқари, фуқароларнинг ўзини-ўзи бошқариш органлари фаолиятини мувофиқлаштириш бўйича Каттақўрғон шаҳар кенгашининг буйруғига асосан маҳалла фуқаролар йиғини раиси ваколати муддатидан олдин тугатилди.
Изоҳ (0)