Тошкент шаҳрининг Сергели туманида жойлашган арзон кўп қаватли уйлардаги хонадонлар аҳолисининг улар яшаётган уй-жойлар нархининг ошиши юзасидан норозилигига сабаб бўлган ҳолат бўйича Олий Мажлис депутати Расул Кушербаев муносабатини билдирди.
Ўтган йилнинг ёзида Сергелида қурилаётган уй-жойларнинг нархи кескин ошиб кетганлиги юзасидан дастлаб Тошкент шаҳар ҳокими ва ‘Ўзшаҳарқурилишинвест’ ИК, кейинчалик Қурилиш вазирлиги, ‘Ўзқурилишматериаллари’ АК ва бошқа масъул идораларга депутатлик сўрови билан чиқиб, уларни ушбу масалага очиқ кўз билан, бир ойда 1 ёки 1,5 миллион даромад қиладиган уйга муҳтож оиланинг қаричи билан қараб, хулоса чиқаришларини сўровдим.Бундан аввал, Сергели туманида жойлашган арзон кўп қаватли уйлардаги хонадонлар аҳолисининг улар яшаётган уй-жойлар нархининг ошиши юзасидан норозилигига сабаб бўлган ҳолат Ўзбекистон Республикаси Олий Мажлисининг Инсон ҳуқуқлари бўйича вакили (Омбудсман) томонидан назоратга олингани ҳақида хабар берган эдик.Афсус шаҳар ҳокими жамоаси ўшандаёқ бу масалага кўз юмиб қўя қолди: бир ой уриниб, ахийри сарсон сўровни ‘Ўзшаҳарқурилишинвест’ ИКга йўналтиришган холос.
Қолганлари ҳам узоқ тушунтиришиб, оддий айтганда ‘аравани роса судраш’дан нарига ўтишмади. Бироқ 2019 йилда нарх ошмайди, махсус лойиҳа ишлаб чиқдик, деган ваъдалар бор эди... қани?
Хуллас ўша вақтда қўйилган саволимга ҳозиргача жавоб ола олмаяпман: барака топгур қурувчи, директор, раис, ҳоким ва кўплаб масъуллар яна сўраяпман: Сизларнинг уйга муҳтожлар учун ‘арзон уй-жой’, деган уйларингиз республика бўйлаб қурилаётган айрим тижорат уйларидан ҳам қимматга айланиб кетаяптику! Камига сифатсиз деган гаплар юрибди. Буни қандай изоҳлайсизлар? Бу уйларни арзон дейиш мумкинми?
Гапларимга ишонмасангиз olx.uz сайтига кириб кўринг.
Ота-боболаримиз амал қилиб келган ‘лафз’ деган гап бор ахир, бошда келишилдими бўлди: охиригача лафздан қайтмаслик керак. Бизга шуни ўргатишмаганми аждодларимиз: лафзсизнинг охири вой ва шармандалик.
Расул Кушербаев, Олий Мажлис депутати
Изоҳ (0)