1997 йил Зумрад Оллаберганова турмуш ўртоғининг алдовларига учиб Ўзбекистондан чиқиб кетади ва улар «Ўзбекистон ислом ҳаракати» халқаро террористик ташкилотининг жангарилар тайёрлаш лагерига боради. Бу ҳақда ЎзА хабар бермоқда.
1997 йилдан 2018 йилга қадар Тожикистон, Афғонистон, Покистон ҳудудларида «Ўзбекистон ислом ҳаракати» ташкилоти томонидан ташкил қилинган «аёллар жамоатлари» сафида бўлган Зумрад Оллаберганова жанговар ҳаракатларда иштирок этиш ва маҳоратини ошириш бўйича тайёргарликдан ўтади.
Террористик ташкилот ишларига 1996 йилда туғилган ўғли Муҳаммадёқуб Олламовни ҳам жалб этади. Муҳаммадёқубга юз бераётган воқеаларни тасвирга олиш ҳамда уларни интернет тармоғига жойлаштириш ва шу орқали одамларни қизиқтириб, ташкилот аъзоларининг сонини кўпайтириш вазифаси юклатилган эди.
Муҳаммадёқуб террористик ташкилот таркибида Покистон ҳукумати қўшинларига қарши ўтказилган жангда ҳалок бўлади.
Турмуш ўртоғи Норбек Олламов эса 1999 йилнинг октябрида бир гуруҳ жангарилар қаторида Тошкент вилоятининг Ангрен шаҳрига суқулиб кирмоқчи бўлганда йўқ қилинади.
Зумрад Оллаберганова 2000 йилда бошқа бир жангари Бахтиёр Наврўзматовга шаърий никоҳ асосида турмушга чиқиб, Сумайя исмли қиз фарзанд кўради. У юз берган нотинчликлардан кейин бошқа аёллар сингари Покистоннинг Жанубий Вазиристон минтақасининг Вана қишлоғига кўчирилади. Бу ерда Сожида исмли фарзанди туғилади.
—Буларнинг йўналишларидан хабар топганимдан кейин иложи борича ватанга қайтишга харакат қилганман, уйдагилар билан гаплашиб, қандай қайтиш йўллари борлигини излаганман. Шу билан яна жанглар, урушлар у тарафнинг оғир ҳаёти бошланди. 2015 йил Афғонистонга яна шу гуруҳ билан қайтдик, гуруҳ ичида кимки қайтишини сездириб қўйса отиб ташланар ёки ёш боласи қўлдан олиб қўйилар эди. 2018 йил июль ойида болларим билан саккиз жон Ўзбекистон консуллигига пушаймонлик аризаси билан кириб бордим. Хато йўллардан юрганликларимдан пушаймонман, Президентдан ва халқимиздан кечирим сўрайман, — дейди Зумрад Оллаберганова.
Зумрад Оллабергановага оид жиноят ишини кўриб чиқишда суд барча ҳолатларни эътиборга олди.
Жиноят ишлари бўйича Хоразм вилоят суди судьяси Раъно Камоловага кўра, суд жараёнида Зумрад Оллаберганова ўз айбига иқрор бўлиб, пушаймонлик билдирганлиги, шунингдек, унинг 6 нафар вояга етмаган фарзанди борлиги, хотин-қизлар қўмитаси томонидан кафиллик хатлари берилганлиги инобатга олинди. Унга нисбатан озодликни чеклаш жазоси тайинланди.
Изоҳ (0)