Ҳинд актёри ва режиссёри Раж Капур (1924—1988)нинг оиласи аъзолари у 70 йил аввал Бомбай (ҳозирги Мумбай)да асос солган RK Studios студиясини сотишга қарор қилди, деб ёзади «ТАСС».
The Times of India хабарига кўра, бундай қарор оиланинг барча вакиллари иштирокидаги учрашувда қабул қилинган. Раж Капурнинг тўнғич ўғли, актёр, режиссёр ва продюсер Рандхир Капур бу маълумотни тасдиқлади. У студия жойлашган бутун ер майдони сотилишини, бундай қарорни қабул қилиш улар учун осон кечмаганини айтди.
«Биласиз, ўтган йили студияда ёнғин юз берди, шундан кейин биз студияни таъмирлаш ҳақида ўйладик, аммо бунга жуда катта пул керак бўлади», — деди Капур.
1948 йилда асос солинган RK Studios студиясида Болливуднинг «Дайди», «Жаноб 420» каби классик фильмлари ҳам суратга олинган.
Изоҳ (0)