Бухорода ижтимоий ҳимояга муҳтож, ногиронлиги бўлган 193 фуқарога янги уйларнинг калити топширилди. Бу ҳақда ЎзА хабар берди.
Шу муносабат билан Бухоро шаҳридаги Лаби ҳовуз мажмуаси ҳудудида тантанали маросим бўлиб ўтди. Унда пойтахтдан келган қатор мутасадди идоралар, вилоят жамоатчилиги вакиллари, кўп йиллик орзуси ушалган эҳтиёжманд оилалар иштирок этди.
Жорий йилда Бухоро вилояти бўйича ана шундай тоифага мансуб оилаларнинг 1156 таси имтиёзли шартлар асосида уй-жой билан таъминланади.
— Шу пайтга қадар тўрт оила бир ҳовлида яшар эдик, — дейди Пешку туманидан Раъно Рафиқова. — Бунинг нечоғли машаққат ва ноқулай эканини бошидан ўтказган билади. Беш фарзандимиз бор, улардан бири ногирон. Мен улар тарбияси билан бандман. Ёлғиз ўзи ишлайдиган турмуш ўртоғимнинг маоши фақат рўзғор тебратишга етади. Бу аҳволда яқин йилларда уйли бўлишимизга ишонмасдим. Бугун Янгиобод қишлоғида намунавий лойиҳа асосида қурилган икки сотихдан иборат уч хонали уй калити ва бошланғич бадал тўлангани тўғрисида сертификат топширилди. Бадал давлат томонидан тўланди, уй нархининг қолган 130 миллион сўми банк томонидан 15 йилга кредит сифатида ажратилди.
Маросим катта байрамга айланиб кетди. Тантанада кўҳна Бухорони томоша қилгани келган бир гуруҳ хорижлик сайёҳлар ҳам иштирок этди.
Изоҳ (0)