Нукуснинг турли бурчакларига «I love Nukus» ёзуви ўрнатилади

Нукус шаҳар ҳокимлигида шаҳардаги барча бюджет ташкилотлари раҳбарлари ва жавобгар шахслари иштирокида йиғилиш бўлиб ўтди, деб хабар беради «KRuz.uz».

Йиғилишда тўрт сектор раҳбарлари иштирок этди. Шаҳар ҳокими вазифасини вақтинча бажарувчи Парахат Торешов бир қатор мурожаатларни тинглагач, ўз фикрларини билдириб ўтди.

«Бешта ўринбосаримнинг ҳар бирига «I love Nukus» ёзувини ўрнатишни топшириқ бердим. Яқин кунларда шаҳримизнинг турли бурчакларида бундай ёзувлар пайдо бўлади», — дейди ҳоким.

Шунингдек ҳоким мурожаатларни оғзаки тарзда қабул қилишга тайёрлигини ҳам маълум қилди:

«Қоғозбозлик керак эмас. Қайси тадбиркорни муаммоси бўлса олдимга келсин. Хат ёзса мен унга жавоб ёзишим керак. Бу оралиқда қанча вақт йўқолади. Нима кераги бор расмиятчиликни. Муаммосини айтсин ўрганиб чиқиб ҳал қилиб берайлик».

Ҳоким мини футбол майдончаси қурадиган тадбиркорларга алоҳида мурожаат қилган. «Мини футбол майдончаси қурадиган тадбиркорлар бўлса келсин. Биз қўлдан келганча ёрдам беришга тайёрмиз».