ЎзЛиДеП солиқ сиёсатини такомиллаштиришга доир таклифларни ишлаб чиқмоқда
Тошкентда Тадбиркорлар ва ишбилармонлар ҳаракати — Ўзбекистон Либерал-демократик партияси, Ўзбекистон тадбиркорлар ва фермерларни қўллаб-қувватлаш маркази томонидан «Қонун лойиҳаларининг жамоатчилик экспертизаси» лойиҳаси доирасида солиқ тизимини ислоҳ қилиш концепциясини муҳокама қилиш ва ЎзЛиДеПнинг солиқ сиёсатини такомиллаштиришга доир таклифларини ишлаб чиқишга бағишланган давра суҳбати ўтказилди. Бу ҳақда ЎзА хабар бермоқда.
Давра суҳбатида мамлакатда қулай бизнес ва инвестицион муҳитни шакллантириш, рақобатбардош маҳсулот ишлаб чиқарувчи корхоналар сафини кенгайтириш иқтисодиётимизни юксалтиришнинг шарти экани таъкидланди. Бу жараёнда солиқ юкини камайтириш, ишбилармонларга яқиндан кўмак бериш, уларни ҳар томонлама қўллаб-қувватлаш муҳим экани қайд этилди.
Шу нуқтаи назардан концепциядаги маҳаллий ишлаб чиқаришни ривожлантириш, экспортга йўналтирилган ва импорт ўрнини босувчи маҳсулотлар ишлаб чиқариш, соғлом рақобат муҳитини шакллантириш, тадбиркорлик фаолияти, бизнесни барқарор ривожлантириш учун қулай бизнес муҳитига кўмаклашувчи мутлақо янги солиқ тизимини шакллантиришга оид меъёрлар қўллаб-қувватланди.
Тадбиркорлик фаолияти соҳасида солиқ қонунчилигининг барқарорлиги қулай бизнес муҳитини шакллантиришда муҳим омил ҳисобланади. Партия ҳудудий кенгашлари томонидан концепция доирасида ишлаб чиқилган таклифлар муҳокамасига алоҳида эътибор қаратилди.
Мазкур концепциянинг қабул қилиниши ва амалга оширилиши кичик бизнес ва хусусий тадбиркорликни жадал ривожлантириш, қулай ишбилармонлик муҳитини шакллантиришга хизмат қилади.
