Ўзбекистон миллий телерадиокомпанияси ўзининг янги нашри – TV Park Uz журналини таъсис этди. «Самарқанд дарвоза» савдо мажмуасида журнал тақдимоти бўлиб ўтди.
Тақдимотда маданият вазирининг биринчи ўринбосари Озодбек Назарбеков, Ўзбекистонда хизмат кўрсатган артист Самандар Ҳамроқулов, тележурналистлар Нозима Воҳидова, Нилуфар Умрзоқова, Гулҳида Жўраева ҳамда бир қанча ОАВ ходимлари иштирок этди.
Тақдимотда иштирок қилган «Дарё» мухбири Феруз Муҳаммад маданият вазирининг биринчи ўринбосари Озодбек Назарбековга журнал ҳақида саволлар билан мурожаат қилди.
Бундан аввал ҳам журнал тақдимотида иштирок этганмисиз?
Бу илк маротаба журнал тақдимотида иштирок этишим. Тўғрисини айтишим керак, бунақа сифатли даражадаги журнал биринчи маротаба чоп этилмоқда.
Тақдимотда санъаткор сифатида иштирок этяпсизми ёки маданият вазирининг биринчи ўринбосари сифатидами?
Энг аввало бу ерда «Ёшлар» телерадиоканалининг бош продюсери сифатида иштирок этяпман. Шу жиҳатдан ҳам журнал тақдири мен учун жуда қизиқ.
TV Park Uz журналининг жамоатчилик кенгаши аъзолари орасида сиз ҳам бор экансиз, ҳақиқатан ҳам журнал ташкил бўлишида ўзингиз ҳам вақт топиб иштирок этдингизми?
Албатта, бу журналнинг ташкил бўлишидан бошлаб жараённинг ичидаман. Журналнинг шу даражада сифатли бўлиши, уни назорат қилишда, фикрлар бериб, ҳамкорлик қилишда қўлимиздан келганича ҳисса қўшдик. Сизнинг саволингизга хилма-хил жавоб берса бўлар экан. Демак, бугунги журналнинг тақдири «Ёшлар» телеканали бош продюсери сифатида мени қизиқтирса, иккинчи жиҳати журналнинг тезроқ жамиятга кириб боришида Ўзбекистон халқ артисти Озодбек Назарбеков сифатида иштироким, умуман Ўзбекистонда маданият соҳасини ривожланишига ҳисса қўшиш маъносида маданият вазирининг биринчи ўринбосари сифатида ҳам бу журналнинг тақдири мен учун қизиқ бўлди.
TV Park Uz журналининг адади 3 мингта экан, бу адад каммасми?
Кам, лекин бу ҳозирча, журнал оммалашмаганлиги, биринчи қадамимиз бўлгани учун етарли деб ўйлайман.
Изоҳ (0)