Россия президенти Владимир Путин Ўзбекистон билан имзоланган, ушбу мамлакат фуқароларини Россияда иш билан таъминлаш бўйича келишувни ратификация қилишни кўзда тутувчи федерал қонунни имзолади, деб ёзади «РИА Новости».
Битим 2017 йилнинг 5 апрелида Москвада имзоланган. Битим Ўзбекистон фуқароларини Россияда мақсадли иш билан таъминлашга ва уларни кейинчалик иммиграцияга қадар ишга жойлашиши учун тайёрлашга қаратилган.
Ҳужжат Ўзбекистон фуқароларини Россияда вақтинча меҳнат қилиш учун юборишга тайёрлаш, хавфли юқумли касалликларни аниқлаш мақсадида тиббий текширувдан ўтказиш масалаларини тартибга солади.
Ушбу битим иш берувчига Россия ваколатли органларига ва Ўзбекистон ташқи миграцияси агентлигига меҳнат муҳожири билан меҳнат шартномаси тугатилганлиги ёки бекор қилинганлиги тўғрисида маълумотларни ўз вақтида тақдим этиш талабини юклайди.
Бундан ташқари, битимда Россияда вақтинчалик меҳнат фаолиятини амалга оширувчи Ўзбекистон фуқароларининг асосий ҳуқуқлари белгилаб берилган. Жумладан, битимда меҳнат қилиш ҳуқуқи, дам олиш ва ижтимоий суғурта (мажбурий тиббий суғуртадан ташқари), Россия қонунчилигига кўра пенсия таъминоти назарда тутилган. Шунингдек, фуқароларга Россия ваколатли органлардан мамлакатда бўлиш тартиб-қоидалари ва шартлари, Россия қонунчилиги талабларидан келиб чиқувчи ҳуқуқ ва мажбуриятлари тўғрисида маълумотларни талаб қилиш ҳуқуқини беради.
Изоҳ (0)