Мирзо Улуғбек тумани ҳокимияти боғча ҳудудида автотураргоҳ қурилишини тўхтатди. Бу ҳақда, маъмурият хабарига асосланиб, «Правда Востока» маълум қилди.
Муқаддам газета 232-мактабгача таълим муассасаси ҳудудида автотураргоҳ қурилиши борасидаги саволни кўтарган эди.
«Аҳоли ва ОАВ томонидан кўтарилган бу саволнинг ижтимоий аҳамияти ҳисобга олиниб, ушбу ҳолатни ҳокимнинг ўзи бориб чуқур ўрганиб чиққан. Автотураргоҳ жойи билан танишиб, ўрганиб чиқилгач, ушбу автотурар майдонни қуриш тўхтатилиши ҳақида қарор қабул қилинган», — дейилади ҳокимият мурожаатида.
Шунингдек, «қурилиш ишларининг давом эттирилиши аҳоли истак ва таклифларига кўра, амалдаги қонун ҳужжатларига асосан шаҳар қурилиш меъёрларини ҳисобга олган ҳолда қайта кўриб чиқилиши» таъкидланган.
31 октябрь куни газета тумандаги 232-мактабгача таълим муассасаси ҳудудида очиқ автотураргоҳ қурилаётгани ҳақида материални чоп этган эди. Ишчилар болалар боғчаси ҳовлисининг ўртасидан панжара ва девор тортаётгани ҳақида хабар берилган эди.
Бунга жавобан ҳокимият вакиллари «автотураргоҳ майдони 232-мактабгача таълим муассасаси ҳудудидан эмас, унинг ёнидан қурилаётгани»ни айтиб ўтган эди.
Ҳокимиятнинг жавобидан сўнг нашр вакили яна бир бор ушбу манзилда бўлиб, боғчанинг кадастр ҳужжатлари билан танишган ва, 2007 йилда тузилган кадастрга кўра, автотураржой қурилишига ажратилган ҳудуд болалар боғчасиники эканлигига яна бир бор ишонч ҳосил қилган эди.
Изоҳ (0)