«Пахтакор»дан 20 кунда бўшатилган Равшан Ҳайдаров Ўзбекистон U22 термаси бош мураббийи бўлди

Равшан Ҳайдаров ва Жасур Абдураимов ўзаро ўрин алмашди. 55 ёшли Ҳайдаров Ўзбекистон U22 терма жамоаси бош мураббийи этиб тайинланди, деб ёзди ЎФФ матбуот хизмати.

Аввалроқ Равшан Ҳайдаров «Пахтакор» бош мураббийлигини қабул қилиб, раҳбарият алмашгач, фаолиятининг йигирманчи кунида ишдан бўшатилганди. Унинг ўрнига эса Ўзбекистон U22 термасини бошқараётган Жасур Абдараимов олиб келинганди.

Ўзбекистон U22 термаси 15 июль куни 2018 йил Хитойда бўлиб ўтадиган Осиё чемпионати учун саралаш турнирини бошлайди. Саралаш ўйинларига БАА мамлакати мезбонлик қилади.

Мураббийлик фаолияти давомида Равшан Ҳайдаров «Трактор» (1997—2001), «Пахтакор» (2002, 2006—2007, 2010—2011, 2017), «Қизилқум» (2012—2013), Самарқанднинг «Динамо» (2013—2014) клубларида бош мураббий бўлиб ишлаган.

Унинг қўли остида «Пахтакор» икки мартадан Ўзбекистон чемпионати ва Кубогида ғолиб чиққан. Шунингдек, Равшан Ҳайдаров 2002—2005 йилларда Ўзбекистон миллий терма жамоаси бош мураббийи, 2007—2010 йилларда «Пахтакор» клубида бош мураббий ассистенти, 2014—2015 йилларда Ўзбекистон U19 термаси устози лавозимида фаолият юритган.