Тошкент шаҳар ИИБ ходимлари ёлғон хабар туфайли 5 кунини беҳудага сафрлади. Бу ҳақда Тошкент шаҳар Ички ишлар бош бошқармаси бошлиғи ўринбосари Дониёр Тошхўжаев маълум қилди, деб ёзади 24POST.
Фуқаро Дилшод Арипов ўзининг ғаразли мақсадини амалга оширишда бошқарувидаги Matiz русумли автоуловини давлат рақамлари бўлмаган кулранг Matiz автомобили сиқиб тўхтатиб, 86 миллион сўм нақд пулларини олиб кетгани ҳақида 2017 йилнинг 18 апрель куни ички ишлар идораларига ёлғон хабар берган.
Ушбу хабарга кўра, ҳолат юзасидан номаълум шахсларга нисбатан Ўзбекистон Республикасининг Жиноят кодекси 166-моддаси тўртинчи қисми «а» банди, яъни, талончилик жиноят аломатлари билан жиноий иш қўзғатилган. Олиб борилган тергов тезкор ҳаракатлари давомида мазкур жиноятни жабрланувчи Дилшод Арипов юқорида кўрсатиб ўтилган 86 миллион сўм пулларни қарзга олиб, қайтариб бермаслик мақсадида жиноий шериклари Алишер Комилов, Азиз Шарипов ва Алишер Турсунов билан бирга уюштирганлиги аниқланган.
Ҳозирда Дилшод Арипов ва унинг жиноий шерикларига Жиноят кодексининг 237-моддаси иккинчи қисми «б» банди, 238-модда биринчи қисми, яъни, ғаразгўйлик ниятларда ёлғон хабар бериш ва ёлғон гувоҳлик бериш жиноят аломатлар билан гумон қилиниб тегишли тергов ҳаракатлари олиб борилмоқда.
Тошкент шаҳар Ички ишлар бош бошқармаси бошлиғи ўринбосари Дониёр Тошхўжаев фош қилиниши керак бўлган жиноятлар ўз ечимини кутиб турган вақтда содир бўлмаган жиноятни очиш учун ички ишлар ходимларининг ўрта ҳисобда 5–6 кун вақти беҳуда сарф бўлганини айтиб, бу каби жиноятларни олдини олиш мақсадида тарғибот ишлари олиб бориш кераклигини таъкидлади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)