Европарламентнинг аксарият депутатлари (516 киши) Буюк Британиянинг Евроиттифоқдан чиқиш шартлари бўйича резолюция учун овоз берди. Бу ҳақда «Коммерсантъ» маълум қилди.
Ҳужжат қабул қилинишига 133 депутат қарши чиқди, 50 киши бетараф қолди.
Резолюцияга Лондон ва Брюссель ўртасидаги Brexit бўйича бўлажак музокаралар йўналишини белгилаб берувчи қатор масалалар киритилган. Жумладан, музокаралар шаффофлиги таъминланиши зарурлиги белгиланган.
Буюк Британия тузилмадан чиққунга қадар Евроиттифоққа аъзо давлатнинг барча ҳуқуқларидан фойдаланиши мумкинлиги билдирилган.
Шу билан бирга, Лондон ўз зиммасига олган мажбуриятлар, хусусан, Евроиттифоқнинг узоқ муддатли бюджетидан келиб чиқувчи молиявий мажбуриятларини ҳам бажариши лозим. Улар ҳатто мамлакат тузилмадан чиққан тақдирда ҳам зиммасидан соқит бўлмаслиги мумкинлиги таъкидланган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)