Дунёдаги энг ғаройиб қушлар (фото)

1 апрель — нафақат Кулгу куни, балки Халқаро қушлар куни эканлигини кўпчилик билмаса керак. Энг ноодатий ва ноёб паррандалар ҳақида бизнинг мақоламизда ўқинг.

Африка туяқуши (struthio camelus)

Айни пайтда яшайдиган қушлар ичида энг каттаси — Африка туяқуши. Унинг узунлиги 2,5 метр, оғирлиги 90—150 килограммга етади. У энг тез югурадиган қушлардан бири — соатига 50 километргача тезликка эриша олади. Югуриш вақтида ҳар битта қадами 4—5 метрга етади. Ҳар битта оёғида иккитадан бармоқ бор (бошқа қушларда уч ёки тўртта бўлади).

Қўнғир киви (apteryx australis)

Қушлар орасида энг «қанотсиз»и —калта қанотлари жунга ўхшаш қалин патлари остида деярли кўринмайди. Кивилар — кўриш қобилияти яхши ривожланмаган ягона қушлар — кўз косасининг диаметри бор-йўғи 8 миллиметрга тенг. Аммо тунги ҳаёт тарзи туфайли, сезиш (пайпаслаш) ва ҳид билиш органлари жуда яхши ривожланган.

Император пингвини (aptenodytes forsteri)

Жанубий ярим шарнинг энг юқори кенгликларида яшайдиган ва қанотлилар ичида паст ҳароратларга энг кўп мослашган қуш. Фақат Антарктида муз қалқони четига ин қуради, баъзан 400 километргача қитъа ичкарисига киради. Совуқ ҳарорат -30 -40 даражадан ошадиган қиш чилласида уялашни бошлайди. Ягона тухумни босиб, бола очади.

Дайди альбатрос (diomedea exulans)

Замонавий қушлар ичида қанотлари қулочи энг катта (351 сантиметргача) бўлган парранда. Қанотлари узун ва ингичка, ўзи эса оғир (12 килограммгача) бўлишига қарамай, альбатрос чарчаб қолмайди. Унинг тирсак бўғимларида қанотларни очиқ ҳолда тутиб турувчи мослама мавжуд. Альбатрос Атлантика кенглигида йилига бир неча марта дунё бўйлаб саёҳат қила олишга қодир.

Ари колибри (mellisuga helenae)

Дунёдаги энг митти қуш, унинг оғирлиги 1,6—1,9 грамм, узунлиги 5—6 сантиметрдан ошмайди. Ўзига хос парвоз тури — «пирпировчи парвоз» колибрига ҳавода бошқа ҳар қанақа қушдан кўра яхшироқ ҳаракатланиш имконини беради. Қанотлари «саккиз» шаклидаги мураккаб ҳаракатларни бажаради, қанот қоқиш тезлиги сониясига 80—100 тагача етади. Юраги ошқозонидан уч маротаба каттароқ бўлиб, тана бўшлиғининг ярмини эгаллайди.

Манба: National Geographic