Деҳли шаҳрида 23 март куни Ўзбекистон ва Ҳиндистон ташқи ишлар вазирликлари ўртасидаги сиёсий маслаҳатлашувларнинг 13-раунди бўлиб ўтди. Ўзбекистон Ташқи ишлар вазирлиги матбуот хизмати хабарига кўра, маслаҳатлашувлар вақтида Ҳиндистон делегациясига ташқи ишлар вазири ўринбосари Прити Саран бошчилик қилди. Ўзбекистон делегацияси раҳбари номи маълум қилинмаган.
«Учрашувда сиёсий, савдо-иқтисодий, маданий-гуманитар ва бошқа соҳалардаги икки томонлама муносабатлар, шунингдек, БМТ, ШҲТ ва бошқа халқаро ташкилотлар доирасидаги ҳамкорликнинг ҳолати батафсил кўриб чиқилди ҳамда халқаро ва минтақавий муаммолар юзасидан фикр алмашилди», — дейилади ТИВ ахборотида.
Икки томон ҳам кўп қиррали ҳамкорликни ривожлантиришга катта аҳамият бериши, турли даражалардаги доимий мулоқотнинг давом эттирилишидан манфаатдор эканлиги қайд этилди.
Учрашувда Тошкент шаҳрида савдо-иқтисодий ва илмий-техникавий ҳамкорлик бўйича Ўзбекистон—Ҳиндистон Ҳукуматлараро комиссияси 11-йиғилишининг келишилган муддатларда ўтказилиши ўзаро манфаатли савдони кенгайтириш, ишлаб чиқариш бўйича қўшма лойиҳалар, шу жумладан хорижий инвесторларга улкан божхона ва солиқ имтиёзларини берадиган Ўзбекистон иқтисодий ҳудудларида қўшма лойиҳаларни амалга оширишга имконият яратишига ишонч билдирилди.
«Маслаҳатлашувлар давомида дипломатлар томонларни қизиқтирган бошқа долзарб масалаларни ҳам кўриб чиқишди», — дея қўшимча қилинган ТИВ ахборотида.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)