Ўзбекистон Республикаси Туризмни ривожлантириш давлат қўмитаси мамлакатда туризмни ривожлантиришни қийинлаштираётган ва сайёҳлик салоҳиятидан самарали фойдаланишга тўсқинлик қилаётган асосий сабабларни келтириб ўтди, деб ёзади «Газета.uz». Улар Республикада туризмни ўрта муддатли истиқболда ривожлантириш концепциясини амалга ошириш тўғрисидаги Президент қарори лойиҳасида санаб ўтилган, ҳужжат муҳокама учун эълон қилинган.
Асосий муаммолар орасида туристлар учун виза режими соҳасидаги маъмурий ва иқтисодий тўсиқлар бор, дейилади ҳужжатда. Миллий сайёҳлик маҳсулотининг рақобатбардошли эмаслиги натижасида яшаш ва авиапарвозлар учун баланд тарифлар, чекланган даражадаги сервис, номукаммал муҳандислик, транспорт ва ижтимоий инфратузилма, қулай сайёҳлик ахборот муҳитининг йўқлиги, малакали кадрлар етишмаслиги, Ўзбекистоннинг хорижда заиф тарзда илгари сурилиши келиб чиқади.
«Туризмнинг динамик ўсиши, унинг иқтисодиётнинг бошқа секторларига сезиларли таъсири, аҳоли фаровонлигининг ошиши ва атроф-муҳитни муҳофаза қилиш бўйича чора-тадбирлар қабул қилиш заруриятини эътиборга олиб, сайёҳлик тармоғи мамлакатни ривожлантириш барқарорлигини оширишнинг энг кучли воситаларидан бирига айланиши керак», — дейилади концепция лойиҳасида.
Президент қарори лойиҳасида Ўзбекистоннинг ҳар битта ҳудудига 2017—2021 йилларда туризмни ривожлантириш ва кучайтириш бўйича ўз дастурини ишлаб чиқиш таклиф этилади.
Меҳмонхоналарда жой брон қилишнинг интеграциялашган ва автоматлаштирилган ягона тизимини яратиш қайд этилган.
Танлов асосида давлат томонидан қўллаб-қувватланадиган йирик сайёҳлик иншоотларини қуриш режалаштирилмоқда.
Банкларга тадбиркорлик субъектларига меҳмонхоналарни қуриш ва модернизация қилиш учун узоқ муддатли (15—20 йил) кредитлар ажратиш таклиф қилинади.
2018 йилдан UzReport World халқаро телеканалини ишга тушириш таклиф этилмоқда.
Изоҳ (0)