Испания Ла лигасининг 21-турига келиб чемпионлик учун кураш олиб бораётган «Севилья» футболчилари 2 очко йўқотди. Куннинг марказий ўйинида «Вильярреал»ни қабул қилган Хорхе Сампаоли шогирдлари 0:0 ҳисобига имзо чекди.
Учрашувнинг 48-дақиқасига келиб мезбонлар пенальти тепиш ҳуқуқини қўлга киритди. Бу вазифани Самир Насри ўз гарданига олди. Бироқ франциялик футболчи «Вильярреал» посбони Серхио Асенхо билан дуэлда енгилди. Дарвозабон зарбани бартараф эта олди.Мазкур турда «Атлетик»ни қабул қилган «Барселона» йирик ғалабага эришганди. Шундан келиб чиқиб, Каталония клуби «Севилья»дан 2 очко олдинга ўтиб олди. «Қироллик клуби»дан эса 1 очко камроқ жамғарилган.
Маълумот учун, Мадриднинг «Реал» клубида 2 та захира ўйини бор. Кеча — 5 февраль куни Зидан жамоаси «Сельта»га қарши майдонга тушиши керак эди. Бироқ Испаниядаги об-ҳаво сабаб 21-турнинг 2 та ўйини қолдирилди. Жумладан «Реал»ники ҳам.
Испания Ла лигаси 21-тур 5 февраль, якшанба