Warner Brothers киностудияси Бирлашган қироллик мустақиллик партияси (UKIP) билан 2016 йилнинг энг муҳим воқеаларидан бири — Буюк Британиянинг Евроиттифоқдан чиқишига бағишланган фильм суратга олиш юзасидан музокаралар олиб бормоқда. Бу ҳақда «ТАСС» хабар бермоқда.
Картина сценарийси учун тузилмадан чиқиш кампаниясининг асосий ҳомийларидан бири, британиялик миллионер Аррон Банкснинг кундалиги асосида тайёрланган The Bad Boys of Brexit («Brexit’нинг ёмон йигитлари») китоби асос бўлиб хизмат қилади.
«Биз китобнинг муаллифлик ҳуқуқини сотиб олмоқчи бўлган Голливуд вакиллари билан жиддий музокаралар олиб боряпмиз», — деди миллионернинг вакили.
The Telegraph манбаларига кўра, Warner Brothers ходимлари Аррон Банкс ва UKIP собиқ етакчиси Найжел Фараж билан 20 январь куни Вашинтонда, АҚШ сайланган президенти Дональд Трампнинг инаугурация маросимида учрашади.
Банкснинг вакиллари бўлажак фильм комедия жанрида олиниши ва ундан келган тушум хайрия мақсадида сарфланишини таъкидлади.