Швециянинг Лундс университети олимлари Ер шарининг сунъий йўлдош орқали олинган суратларини ўрганиб чиқиб, бу йил Санта-Клаус яшаши учун Финляндиянинг Рованиеми шаҳри эмас, Швеция шимолидаги Йокмокк шаҳри энг қулай деган хулосага келди. Бу ҳақда TJournal хабар бермоқда.
Олимларнинг фикрича, айнан у ердан афсонавий сеҳргарга бутун инсониятга совғалар тарқатиш энг қулай бўлган бўларди.
Олимлар пресс-релизида маълум қилинишича, улар тунги сайёранинг сунъий йўлдош орқали олинган суратларини таҳлил қилиб чиққан ва Санта-Клаусга бутун дунё аҳолисига совғалар тарқатиш учун қулай бўлган нуқтани аниқлаган. Бу жой, шунингдек, дунё иқтисодиёти ва аҳоли сони ўзгаришларини акс эттиради.
Швед олимларининг янги тадқиқотлари Санта-Клаус учун энг қулай яшаш жойи вақт ўтиши билан ўзгариши мумкинлигини кўрсатади.
«Натижа кутилмаган бўлиши мумкин, бироқ ернинг юмалоқ эканлигини ҳисобга олса, бу мантиққа эга. Санта Шимолий қутбда яшаши тўғрисидаги илгариги тасаввур ҳам унчалик хато эмас», — дейди Лундс университети ижтимоий-иқтисодий география ўқитувчиси Ола Холл.
Тадқиқот сунъий йўлдош суратларида қайд этилган тунги чироқлар миграция моделларини етарлича аниқ акс эттириши ва дунёвий кўламда қўлланилиши мумкинлигини кўрсатди.