11 ноябрь куни Ўзбекистон «Миллий тикланиш» демократик партиясидан Ўзбекистон Республикаси Президентлигига номзод Сарвар Отамуратовнинг Сирдарё вилояти сайловчилари ва жамоатчилиги билан учрашуви бўлиб ўтди. Бу ҳақда ЎзМТДП Сирдарё вилоят кенгаши матбуот хизмати хабар берди.
Учрашувда турли соҳалар, давлат ва жамоат ташкилотлари вакиллари, хотин-қизлар, ёшлар, маҳалла фаоллари, партия аъзолари ҳамда ОАВ ходимлари иштирок этди.
Тадбирни Болалар спортини ривожлантириш жамғармаси Сирдарё вилояти филиали директори Жамолиддин Комилов очиб берди ва олиб борди.
Учрашув Сирдарё вилоятининг барча туман ва шаҳарларининг сайловчилари билан онлайн видеоконференция орқали мулоқот тарзида бўлиб ўтди.
Дастлаб номзоднинг ҳудуддаги ишончли вакили Норбобо Соатов йиғилганларни Сарвар Отамуратов таржимаи ҳоли билан таништирди. Шундан сўнг номзод сайловолди дастурининг асосий йўналишларини баён этди.
Номзод жорий йилнинг 4 декабрида бўлиб ўтадиган Президент сайлови бутун мамлакат ва халқ қаторида сирдарёликлар ҳаётида ҳам ғоят муҳим ўрин тутадиган ижтимоий-сиёсий тадбир эканлигини алоҳида эътироф этди.
«Мустақил Ўзбекистон тарихининг ҳозирги даврида олдимизда ниҳоятда масъулиятли вазифа турибди. Шуларни инобатга олган ҳолда, дастурда юртимиздаги тинчлик ва осойишталикни, ижтимоий-иқтисодий соҳаларни барқарор ривожлантириш, халқимиз фаровонлигини изчил юксалтириб бориш, ватанимизнинг дунёдаги энг ривожланган давлатлар қаторидан жой олиши йўлидаги эзгу мақсадларимизни рўёбга чиқариш бўйича стратегик ва устувор вазифалар белгиланган», — таъкидлади Президентликка номзод Сарвар Отамуратов.
Номзод сайловчиларни ўз дастури билан таништирар экан, «Миллий тикланиш» партияси маънавий-маърифий соҳани ўзининг дастурий мақсад-вазифалари ичида етакчи ўринга қўйгани кенг жамоатчилик ва сайловчиларга яхши маълум эканлигини таъкидлади. Чунки ўзлигини англаган, қадрият ва анъаналарини эъзозлаган, тарихий хотирасини асраган халқ иқтисодий, ижтимоий ва гуманитар тараққиётга юз тутади.
«Мамлакатда бу соҳада эришилган ютуқларни мустаҳкамлаш ва бу борада амалга оширилаётган ислоҳотларни янада чуқурлаштириш энг муҳим вазифа. Биз доимо миллий ўзликни англаш, миллий ғурур ва қадр-қиммат туйғусини мустаҳкамлаш масалаларига устувор аҳамият берганмиз ва бундан буён ҳам ушбу ҳаётий масалалар диққат-марказимизда бўлади, — деб таъкидлади Сарвар Отамуратов. — Шундай экан, аввало ‘Баркамол авлод — миллат таянчи’ тамойили остида биз ёшлар онгини халқимизга ёт бўлган ‘оммавий маданият’нинг салбий таъсиридан муҳофаза қилишимиз даркор. Уларнинг қалби ва онгига миллий тикланиш ғоясини сингдириш, миллий маънавият ва қадриятлар руҳида тарбиялашни янада кучайтиришимиз лозим. Бунда кино, театр ва эстрада санъатида халқимизнинг бой ва бетакрор тарихи, маданияти, анъаналари ва илғор урф-одатларини таъсирчан бадиий образлар орқали ифода этадиган асарларнинг дунёга келишига кўмаклашиш ҳамда уларни тарғиб қилиш асосий вазифамиздир».
Учрашувда Президентликка номзод Сарвар Отамуратов сайловолди дастурида белгиланган вазифаларга тўхталар экан, бугунги кунда миллат генофондини асраш ва соғлом авлодни вояга етказиш масаласи муҳим вазифа эканлигини таъкидлади. Бу борада номзод дастурида озиқ-овқат хавфсизлигини таъминлаш, генларни модификация қилиш усулидан фойдаланишни чеклаш, аҳолининг овқатланиш маданиятини юксалтириш каби вазифаларнинг белгиланганлиги муҳим аҳамиятга эгадир.
Шу ўринда номзод сайловчилар эътиборини яна бир муаммога қаратди. У ҳам бўлса, айрим ҳолларда бўлса-да, вояга етмаганлар ўртасида турмуш қуриш ҳолатлари ҳали-ҳамон учраб турганлигидир. «Миллий тикланиш» партиясидан номзод қайд этганидек, эрта турмуш ва эрта туғруқларнинг олдини олиш борасида аниқ ва таъсирчан чоралар кўриш, бу борадаги тарғибот-ташвиқот ишлари, жамоатчилик назоратини кучайтириш, аҳолида эрта никоҳга нисбатан муросасизлик туйғусини шакллантириш лозим.
Шунингдек, учрашувда Сарвар Отамуратов дастурда сиёсий ва суд-ҳуқуқ, иқтисодий, ижтимоий, ахборот, спорт ва ташқи сиёсат соҳаларида белгиланган жамиятни ислоҳ этиш ва демократлаштириш, мамлакатни модернизация қилиш жараёнларини янги босқичга кўтаришнинг энг мақбул ечим ва устувор йўналишларига тўхталиб ўтди. Бу каби вазифалар сайловчиларда катта қизиқиш уйғотди.
Номзоднинг дастурини қўллаб-қувватлаб Гулистон давлат университети кафедра мудири А. Йўлдошев, Гулистон шаҳридаги 17-сонли мактабгача таълим муассасаси мудираси Б. Алимова, Мирзобод туманидаги 29-умумтаълим мактаби директори Ў. Гадоев, Сирдарё тумани агросаноат мажмуи ходимлари касаба уюшмаси раиси Б. Исаев ва бошқалар сўзга чиқди.
Учрашув сўнгида Сарвар Отамуратов иштирокчиларнинг барча саволларига жавоб берди.