Евро—2016 нимчорак финалида Исландиядан мағлубият қабул қилиб олиниши билан истеъфога чиққан Англия термаси устози Рой Хожсон хайрлашув матбуот анжуманида иштирок этди.
Евро—2016. «Исландия эртаги» давом этади. Евро дебютанти Англия термасини мусобақадан чиқариб юборди
«Албатта, ҳафсалам пир бўлган. Бундай ёмон ўйин учун қандайдир фикр ҳам билдириб бўлмайди ҳам. Бўлиб ўтган воқеалардан кейин ҳалигача ўзимга келолганим йўқ. Ўша тун кўпчилик учун жуда қийин бўлди», — деди Рой Хожсон хайрлашув анжуманида.
Исландияга қарши беллашувдан кейин Англия Футбол Ассоциацияси Рой Хожсоннинг истеъфосини қабул қилганди. Хайрлашар чоғида мутахассис «Мен танқидларни ўзимга қабул қиламан ва футболчиларни ҳафа қилмаслигингизни сўрайман», — деб фикрини якунлади.
Англия учун муваффақиятсиз якун топган Исландияга қарши ўйиндан кейин терма жамоанинг етакчи футболчилари «Манчестер Сити» вакили Раҳим Стерлингнинг бошланғич таркибда кўриниш беришига қарши бўлганликлари ҳақида гап тарқалганди.
«Агар футболчилар бундан норози бўлсалар, фикрларини қаттиқ сир сақлашибди», — деб масалага изоҳ берди Хожсон. Беллашувдан кейин ечиниш хонасида нималар рўй бергани ҳақида эса мураббий тўхталишни истамади. У бундай жиҳатларни ҳамма билиши керак деб ўйламаслигини айтиб ўтди.
21 ёшли Стерлингнинг бошланғич таркибда майдонга тушишини истамаган етакчилар борлиги ҳақида чиқиш қилган Англия терма жамоаси сардори Уэйн Руни бу лофдан бошқа нарса эмаслигини қайд этган.
Англия ва Исландия терма жамоалари ўртасидаги Европа Чемпионати 1/8 финал учрашувидан кейин The Times нашри барча футболчиларни «0» баҳога лойиқ кўрди ва улар йўл қўйган хатоларни санаб чиқди.All England players receive 0 from the Times. pic.twitter.com/ZyRpy2eUdS
— Richard🇺🇦Godwin (@richardjgodwin) June 28, 2016
Айни вақтда Шотландиянинг «Рейнжерс» клуби шарафини ҳимоя қилаётган машҳур англиялик футболчи Жои Бартон ўзининг Twitter саҳифасида қуйида фикрларни ёзиб қўйди:
«Британиялик мураббийларни Англия термаси учун номзодлар қаторида хатто кўриб чиқмаслик керак. Бу ерда ишлаш улар учун қабр азобидек гап. Карло Анчелотти ёки Жозе Моуриньо идеал вариантлардан бири бўларди».