Кеча, 4 май куни Ўзбекистон футбол федерация ҳамда Ўзбекистон Миллий олимпия қўмитаси президенти Мираброр Усмонов «Ардус» ва «Дўстлик-АИН» жамоалари ўртасида кечган ярим финал учрашувини томоша қилиш учун «Ўзбекистон» спорт мажмуасига ташриф буюрди. «Ардус»нинг 7:2 ҳисобидаги ғалабаси билан якунланган ўйиндан сўнг, Мираброр Усмонов «Спорт» телеканалига интервью берди. Бу ҳақда Ўзбекистон футбол федерацияси матбуот хизмати хабар бермоқда.
«Футзал бўйича Ўзбекистон терма жамоасининг жаҳон чемпионатига йўлланмани қўлга киритиши ўз-ўзидан бўлгани йўқ. Бу ютуқнинг ортида энг аввало ҳукуматимизнинг спортни ривожлантиришга кўрсатаётган ғамхўрлиги, Ўзбекистон футбол федерацияси ва Ўзбекистон футзал уюшмаси томонидан амалга оширилган катта ҳажмдаги ишлар, ишқибозларнинг қўллаб-қувватлаши, ОАВ, хуллас, каттадан катта меҳнат ётибди, десам адашмаган бўламан», – деди Мираброр Усмонов.
Мираброр Усмонов, шунингдек, футзал бўйича Тошкентда бўлиб ўтган Осиё чемпионати ҳақидаги саволга жавоб бераркан, ишқибозларнинг жонкуярлигидан ҳайратда қолганлигини айтиб ўтди.
«Одамлар нафақат футзалга келиб, футзал кўришни, балки турли мусобақаларда дунёни ҳавас қилдирадиган даражада мухлислик қилишни бошлади. Одамлар футзалчиларни нафақат таний бошлади, балки уларни ўзларига кумир қилиб олди. Тошкентдаги Осиё чемпионатида бизнинг мухлислар шунақа чиройли муҳитни яратиб беришдики, ОФК эътирофи ўз йўлига, мен улар ичида ўтирган бир ўзбекистонлик сифатида улар билан фахрландим. Терма жамоамиз бундай мухлисликдан кейин жаҳон чемпионатига чиқмаса бўлмасди», – дейди Мираброр Усмонов.
Мираброр Усмонов миллий терма жамоа мавзусидаги саволларга ҳам жавоб берди.
«Биз терма жамоаларга уларнинг халқаро мусобақаларда муваффақият қозониши учун етарли шарт-шароитларни яратиб бердик. Пойдевор қурдик. Замин ҳозирладик. Энди жаҳон чемпионатига чиқиш вақти келди ва биз бунинг учун бор имкониятимизни ишга соламиз», – дейди федерация президенти.
Мираброр Усмоновнинг интервьюси шу ҳафтада «Спорт» телеканалида намойиш этилади.