30 апрелдан 7 майгача Португалиянинг Фунчал шаҳрида сузиш бўйича Европа Очиқ Чемпионати бўлиб ўтмоқда. Унда иштирок этаётган ўзбекистонлик спортчилар мусобақанинг илк кунларидаёқ жаҳон ва Осиё рекордларини янгилади, деб хабар берди «Дарё»га Ўзбекистон миллий паралимпия уюшмаси.
Жумладан, Одилова Муслима 100 метрга баттерфлай услубида 1:04,98 натижа билан жаҳон рекордини янгилаган бўлса (2015 йили Буюк Британиянинг Глазго шаҳрида бўлиб ўтган мусобақада америкалик спортчи Майерс Рэбека 01:05,03 вақт билан жаҳон рекордини қўйган), Тошпўлатова Шохсанам 1:05,81 натижа билан Осиё рекордини янгилади (2010 йили Нидерландиянинг Эйндховен шаҳрида япониялик Касомото Акари 01:22,00 вақти билан Осиё рекордини қўйган).
Эркаклар ўртасида 100 метр масофага баттерфлай услубида Панков Кирил 00:57,97 натижаси билан Осиё рекордини янгилади (2016 йили Япониянинг Фужи шаҳрида бўлиб ўтган мусобақада япониялик Томита Учу 01:04,73 вақти билан Осиё рекордини қўйган).
Изоҳ (0)