30-apreldan 7-maygacha Portugaliyaning Funchal shahrida suzish bo‘yicha Yevropa Ochiq Chempionati bo‘lib o‘tmoqda. Unda ishtirok etayotgan o‘zbekistonlik sportchilar musobaqaning ilk kunlaridayoq jahon va Osiyo rekordlarini yangiladi, deb xabar berdi “Daryo”ga O‘zbekiston milliy paralimpiya uyushmasi.

Jumladan, Odilova Muslima 100 metrga batterflay uslubida 1:04,98 natija bilan jahon rekordini yangilagan bo‘lsa (2015-yili Buyuk Britaniyaning Glazgo shahrida bo‘lib o‘tgan musobaqada amerikalik sportchi Mayers Rebeka 01:05,03 vaqt bilan jahon rekordini qo‘ygan), Toshpo‘latova Shoxsanam 1:05,81 natija bilan Osiyo rekordini yangiladi (2010-yili Niderlandiyaning Eyndxoven shahrida yaponiyalik Kasomoto Akari 01:22,00 vaqti bilan Osiyo rekordini qo‘ygan).

Erkaklar o‘rtasida 100 metr masofaga batterflay uslubida Pankov Kiril 00:57,97 natijasi bilan Osiyo rekordini yangiladi (2016-yili Yaponiyaning Fuji shahrida bo‘lib o‘tgan musobaqada yaponiyalik Tomita Uchu 01:04,73 vaqti bilan Osiyo rekordini qo‘ygan).