Зика иситмасининг эндемик ҳудудлардан Ўзбекистонга ҳам кириб келиш хавфи мавжуд. Бу ҳақда, Ўзбекистон Давлат санитария-эпидемиология назорати маркази бўлим бошлиғи Ҳусан Сапаровга асосланиб, «Даракчи» газетаси хабар бермоқда.
«Зика иситмасининг бошқа давлатлар, жумладан, Ўзбекистон ҳудудига ҳам эндемик ҳудудлардан кириб келиш хавфи мавжуд», — дейди Сапаров. Унинг сўзларига кўра, касалликнинг яширин даври 3 кундан 12 кунгача давом этади. Касаллик 70 фоиз ҳолатларда клиник белгиларсиз кечади.
Касаллик билан оғриганда бош оғриғи, бўғинларда, кўз чуқури соҳасида оғриқ, ҳолсизлик, макулёз ёки популёз тошмалар тошиши, тана ҳароратининг кўтарилиши, совқотиб қалтираш, кучли ёруғликдан безовта бўлиш, баъзи ҳолатларда кўнгил айниши, қусиш, ошқозонда оғриқ кузатилади.
Касаллик асосан енгил, ўрта оғирликда кечади ва, шу сабабли, беморлар тўлиқ тузалиб кетади, ўлим ҳолати деярли кузатилмайди.
«Зика иситмасининг махсус иммунопрофилактикаси ишлаб чиқилмаган. Чивин чақишидан асрайдиган кийимларни кийиш, репеллентлардан фойдаланиш, эшик-деразаларга тўрлар ўрнатиш, чивинларнинг кўпайишига йўл қўймаслик чораларини кўриш, шунингдек, аҳоли ўртасида тарғибот-тушунтириш ишларини олиб бориш касалликнинг профилактикасида муҳим ўрин тутади», — дейди Давлат санитария эпидемиология назорати маркази вакили.
Изоҳ (0)