Озарбайжоннинг Нахичеван шаҳрида шахмат бўйича «Nakhchivan Open-2015» фестивали давом этмоқда. Фестиваль иштирокчиларнинг рейтинг ўрнига қараб бир нечта гуруҳларда ташкил этилмоқда. Бу ҳақда «Olamsport» хабар берди.
Энг кучли қатнашчилар жам бўлган “A” гуруҳида 17-Жаҳон чемпиони, ўзбекистонлик Рустам Қосимжонов ҳам иштирок этяпти. Мусобақанинг “A” гуруҳида айнан Қосимжонов биринчи рақамли иштирокчи сифатида қайд этилган. Лекин ҳозирча бу устунлик ўзини оқламаяпти. 1-турда ҳамюртимиз оқ доналарда ўйнашига қарамай, мезбон шахматчи Аяз Мамедовни мағлубиятга учрата олмаганди. Кеча Қосимжонов 2-турда яна бир озарбайжонлик шахматчи Гулнар Маммадовани енга олмади.
Икки имкониятдан бир очкога эга бўлиб турган ҳамюртимиз турнир жадвалида қўшимча кўрсаткичларга кўра 66 иштирокчи орасида 40-ўринни эгаллаб турибди. Бир йўла беш нафар шахматчи юз фоизлик кўрсаткич билан пешқадамлик қилишяпти. Бугун Қосимжонов оқ доналарда мезбонлар вакили Логман Гулиев билан муносабатларига ойдинлик киритиб олади. Гулиев бир учрашувда ғалаба қозониб, яна бирида дуранг қайд этган.
Таъкидлаш жоиз, мусобақанинг умумий мукофот жамғармаси 40 минг АҚШ доллари бўлиб, унга кўра “A” гуруҳи ғолиби 10 минг доллар мукофот пулига эга бўлади. Иккинчи ўринни эгаллаган шахматчи ўз ҳамёнини 5, кучли учликни якунлаб берган иштирокчи эса 3 минг АҚШ долларига бойитиб олади.
Изоҳ (0)