Ўзбекистонда мукофот жамғармаси 10 миллион сўмга яқин бўлган блогерлар танловига старт берилади

Наврўз байрами кунида Ўзбек блогерлари чемпионатининг иккинчи мавсумига старт берилади. Бу ҳақда чемпионат ташкилотчиларидан бири, ҳуқуқшунос Хушнудбек Худайбердиев ўз расмий сайти орқали маълум қилди.

Қайд этилишича, 2013 йилнинг сўнггида, анриқроғи 30 декабрь куни ўзбек блогерлари орасида илк чемпионатга старт берилган. 3 ой давом этган илк чемпионат 5 босқичли тизимда ташкил қилинди.  Илк чемпионатда жами 116 нафар блогер иштирок этиб, бутун чемпионат давомида 221 та блогпост ёзилган эди.

«Дастлабки чемпионат муваффақиятли ўтгандан сўнг, бизда чемпионатнинг иккинчи мавсумини ўтказиш иштиёқи кучайди. Аммо мазкур чемпионат келажаги бор лойиҳа бўлганлиги сабабли, унинг давомийлигини сақлаш учун фақат сон эмас, сифатга алоҳида эътибор бериш лозимлигини инобатга олиб, узоқ муддат бўлса-да, лойиҳа устида изланишлар олиб бордик, йўл қўйилган камчиликларни бартараф этиш ҳаракатида бўлдик. Мана орадан салкам 1 йил вақт ўтиб, биз чемпионатнинг иккинчи мавсумига старт бериш арафасида турибмиз ва бу хабарларни Сизларга мамнуният билан етказяпман», − деб ёзади Хушнудбек Худайбердиев.

Демак, Наврўз байрами кунида Ўзбек блогерлари чемпионатининг иккинчи мавсумига старт берилади.

Мазкур чемпионатни олдингисига қараганда анча савияли ўтказиш режалаштирилмоқда. Хусусан, чемпионатнинг иккинчи мавсуми учун блогерларни бирлаштирадиган махсус портал ишлаб чиқилмоқда.

Шунингдек, соврин жамғармаси ҳам ҳазилакам эмас, албатта. Ғолиблар қуйидаги совринлар билан тақдирланишади:

• 1-ўрин: 4 миллион сўм;
• 2-ўрин: 2 миллион сўм;
• 3-ўрин: 1 миллион сўм.

Шунингдек, қуйидаги номинациялар бўйича ҳам ғолиблар аниқланади:

• «Ватанпарварлик мавзусида ёзилган энг яхши иш» – 750 минг сўм.
• «Ўзбекистонда ёшлар ҳаётини ёритган энг яхши блогер» – 500 минг сўм.
• «Ижтимоий муаммоларни ноодатий тарзда ёритган блогер» – бадиий китоблар тўплами.
• «Соғлом турмуш тарзини тарғиб қилган энг яхши блогер» – чемпионат ҳамкори Championat.asia сайти томонидан 500 минг сўм билан мукофотланади.

«IТ Блог» – ҳамкоримиз UzInfoCom компьютер ва ахборот технологияларини ривожлантириш ҳамда жорий этиш маркази мазкур номинация бўйича 3 нафар блогерга 2 йил муддатга 500 М хостинг ажратади ҳамда танланган блогерларга www.index.uz техноблогида 3 та текин PR-мақола жойлаштириш ҳуқуқини беришади (аслида техноблогда битта PR-мақола жойлаш 150 минг сўм). Шунингдек, «IT Блог» номинацияси бўйича танлаб олинган блогерлар учун Index.uz техноблогида алоҳида саҳифа ҳам ажратилади.

Махсус номинация: «Ўз ишларида ўзбек тилининг имло қоидаларига амал қилган энг яхши блогер» – Ўзбекистон Миллий энциклопедиялар тўплами (13 та том) ва Ўзбек тилининг изоҳли луғатлари тўплами (5 та том).

Шунингдек, чемпионат ҳамкори УзИнфоCом маркази томонидан финалга йўл олган барча 10 нафар блогерларга 2 йил муддатга текин хостинг ажратилади. Бунда 1−3-ўринларни олган блогерларга 1 Гб ҳажмдаги, қолган 7 нафар финалчиларга эса 250 Мб ҳажмдаги хостинг тақдим этилади.

Албатта ҳақли савол туғилади: танловда қандай қатнашиш мумкин? Танлов шартлари билан қаерда танишса бўлади?

Ушбу саволларга тўлиқ жавобни тез кунда етказилиши айтилган. Ҳозирча танловда қатнашишга доир энг керакли маълумотлар тақдим этилган:

• Танловда барча иштирок эта олади: шахсий блог юритадиганлар ҳам, умуман блоги йўқлар ҳам. Блоги мавжуд бўлмаган иштирокчиларнинг қатнашиш шартлари кейинроқ маълум қилинади;
• Танловда ўзбек ва қорақалпоқ тилларида ёзилган ишлар қабул қилинади;
• Танлов 3 босқичда ўтказилади. 1-босқичда иштирокчилар сони чекланмаган, 2-босқичда энг яхши 30 нафар блогер саралаб олинади, финал босқичида эса 10 нафар блогер куч синашади;
• Танловнинг биринчи босқичида қатнашиш учун 2014 йил 1 апрелдан 2015 йил 1 апрелга қадар ёзилган блогпостлар тақдим этилиши мумкин. Шу сабабли, танловга старт берилишини кутиб ўтирмасдан, бемалол бугундан блог ёзишга киришишингиз мумкин;
• Танловнинг биринчи босқичига 3 тагача ишлар тақдим этиш мумкин;
• Блогерлар исталган кўринишда блогпост ёзиши мумкин. Блогпост ҳажми чекланмаган. Блогпост шаклига (матн, фото, видео, аудио ва ҳ.к.) ҳам чеклов йўқ. Бу блогернинг ўз услубига ва креативлигига ҳавола.
• Танлов ғолиблари апрель ойининг охирларида аниқланади.

Ҳозирча шулар. Сизга маслаҳатим, бугундан қўлга қалам олиб, блог юритишни бошланг. Танловда қатнашинг ва миллионерга айланинг! Барчангизга омад тилайман!