Голливуд актёри Робин Уильямс 63 ёшида вафот этди

АҚШлик актёр Робин Уильямс 63 ёшида вафот этди. Унинг жасади маҳаллий вақт билан 11 август, душанба куни 11:55 да (Тошкент вақти билан 11 август 23:55 да) Калифорния штати Тибурон шаҳридаги уйида топилган.

ИТАР-ТАССнинг полицияга таяниб маълум қилишича, актёр ўз жонига қасд қилган бўлиши мумкин. Полиция расмий ҳужжатларида актёр танасида асфиксия (нафас сиқилиши) белгилари борлиги қайд этилган. Расмий маълумот 12 август кунига белгиланган экспертизадан сўнг эълон қилинади.

Робиннинг вакили Мара Буксбаум унинг сўнгги вақтларда депрессияга тушиб қолганини айтди.

Уилямс 1951 йилда Чикогода туғилган. Жуллиард драма мактабини битириб, катта саҳнага йўл олган.

Актёрнинг «Хайрли тонг, Вьетнам» (Good Morning, Vietnam), «Ўлик шоирлар жамияти» (Dead Poets Society), «Уйғониш» (Awakenings), «Ақлли Уилл Ҳантинг» (Good Will Hunting) каби фильмлардаги роллари унга битта «Оскар», бешта «Олтин глобус» мукофотларини келтирган.

Ўзбекистонлик томошабинлар Робин Уилямсни асосан «Жуманжи» (Jumanji), «Даутфайр хоним» (Mrs. Doubtfire) ва «Икки юз ёшли одам» (Bicentennial Man) фильмлари орқали яхши танийди.