Киевдан тайинланган Донецк вилоят ҳукумати ҳудуднинг мақомини белгилаш борасида референдум ўтказишга рози, аммо бунинг учун вилоят маъмурияти биносини бўшатиш ва музокаралар ўтказиш лозим. Буни 10 апрель куни брифингда «Донецк халқ республикаси» муваққат коалицион ҳукумати раиси Денис Пушилин маълум қилди, деб ёзади «РИА Новости».
Унинг сўзларига кўра, Киевдан тайинланган губернатор Сергей Тарута ва Донецк шаҳри ҳокими Александр Лукьянченко жамоат тартибини сақлаш учун ҳамкорликдаги милиция патруллари ва халқ кўнгиллилари гуруҳлари тузиш, Донецк вилоят кенгаши ҳамда «Донецк халқ республикаси халқ кенгаши» депутатлари иштирокида қўшма сессия ўтказиш ва вилоят ҳокимияти биносини эгаллашда иштирок этганларнинг барчасига тўлиқ амнистия эълон қилиш каби таклифларни ҳам билдирганлар.
«Муваққат ҳукумат» ва «халқ кенгаши» расмий ҳукуматнинг таклифларини ўз йиғилишларида муҳокама этиб, вилоят маъмурияти биносининг икки қаватини бўшатиб беришга келишдилар. Брифингдан кейин – 11 апрелга ўтар тунда «муваққат ҳукумат» вакиллари, жумладан, унинг раиси Денис Пушилин ва «халқ қўшини» қўмондони Игорь Хакимзянов бу масалада музокара олиб бориш учун Киев тарафдорлари билан учрашдилар. Музокаралар натижалари ҳозирча эълон қилинмаган.
Илгари Донецк вилоят кенгаши депутатлари Донецк халқ республикасининг давлат мустақиллигини эълон қилган ва ҳудуднинг Россия таркибига қўшилиши масаласи бўйича 2014 йил 11 майдан кечиктирмасдан референдум ўтказишга қарор қилган эдилар.
Изоҳ (0)