Davlat aktivlarini boshqarish agentligi “O‘zbekneftegaz” AJ tarkibidagi “Sho‘rtangazkimyo majmuasi” MCHJ tasarrufidagi bolalar bog‘chalarini xususiylashtirilishi yuzasidan ijtimoiy tarmoqlarda aytilgan fikrlarga munosabat bildirdi.
Avvalroq “Kun.uz” Qashqadaryo viloyatidagi jami 700 o‘rinli 4 ta “Erkatoy” bog‘chalari “bo‘sh turgan obekt” sifatida sotuvga qo‘yilishi haqida yozgandi. Tahririyatga murojaat qilgan ota-onalarning aytishicha, bu bog‘chalar bo‘sh emas – ular ishlab turibdi.
Qayd etilishicha, “Davlat mulkini boshqarish to‘g‘risida”gi qonun talablariga muvofiq har yili o‘tkaziladigan tahlil va yalpi xatlov natijalari bo‘yicha xususiylashtirish dasturi ishlab chiqiladi. Jumladan, 2023-yilda o‘tkazilgan tahlil va xatlov natijalari bo‘yicha 2024-yilgi xususiylashtirish dasturi tasdiqlangan hamda unda 250 ga yaqin davlat korxonalari va ularning ulushlari, 1 000 dan ortiq ko‘chmas mulk obyektlari ro‘yxati tasdiqlangan.
Xususan, “O‘zbekneftegaz” AJning bugungi kunda bozorda xususiy tadbirkorlar faoliyat ko‘rsatayotgan va faoliyatiga xos bo‘lmagan 23 ta aktivlari dasturga kiritilgan. Ulardan 4 tasi jamiyat tizim korxonasining bolalar bog‘chasi hisoblanadi.
Taʼkidlanishicha, xususiylashtirish dasturi qarorida ijtimoiy soha obyektlarini sotish muddati va shartlari, shu jumladan, faoliyat turini saqlash shartlari Davlat mulkini xususiylashtirish va xususiylashtirish jarayonlarini muvofiqlashtirish bo‘yicha komissiyasi tomonidan belgilanishi ko‘rsatilgan.
Ushbularga ko‘ra, mazkur bolalar bog‘chalarining uzluksiz va samarali faoliyatini taʼminlash bo‘yicha aniq choralarni belgilash ishlari yakunlanmagunga qadar, ular ommaviy savdolarga chiqarilmaydi va “Sho‘rtan gaz kimyo majmuasi” MCHJning 4 ta bolalar bog‘chasi sotilmaydi, hozircha korxona ixtiyorida qoldiriladi.
Qo‘shimcha ravishda taʼkidlash zarurki xususiylashtirish dasturida avval (sobiq) ijtimoiy soha obyekti bo‘lgan bo‘sh turgan obyektlar tegishli soha vazirligi bilan kelishilgan holda dasturga kiritilgan, alohida eʼtiborli tomoni shundaki, bunday sobiq ijtimoiy soha obyektlari taʼlim, maktabgacha taʼlim, sog‘liqni saqlash sohasida xususiy muassasalarini tashkil etish sharti bilan xususiylashtirilishi belgilab qo‘yilgan, — deyiladi munosabatda.
Avvalroq “O‘zbekiston shampani”ning davlat ulushi 72 mlrd so‘mga sotilgani, “Paxtakor” futbol klubini xususiylashtirish vaqtincha to‘xtatilgani, sobiq tashqi ishlar vaziri Abdulaziz Komilovning o‘g‘li “O‘zbekneftgaz” zapravkalari egasiga aylangani to‘g‘risida xabar berilgandi.
Izoh (0)