Eronga qarshi Amerika–Isroil operatsiyasi boshlanganiga 12 soat bo‘ldi. AQSH prezidenti Donald Tramp va Isroil bosh vaziri Binyamin Netanyaxu maqsad Eron rejimi tahdidini bartaraf etish ekanini ma’lum qildi.
Eron bo‘ylab harbiy obyektlar — Kirmonshoh, Hamadon va Tabrizdagi raketa bazalari, shuningdek Tehron va uning atrofidagi, Isfahon hamda Qumdagi raketa ishlab chiqarish va raketa qo‘mondonligi markazlari raketa va aviatsiya zarbalariga uchradi.
Isroil harbiy-havo kuchlari uchun 2026-yil 28-fevraldagi operatsiya tarixdagi eng yirigi bo‘ldi. Unda qariyb 200 ta samolyot ishtirok etdi va 500 ga yaqin nishonga zarba berildi.
Eron esa o‘z navbatida Isroilga, shuningdek AQSHning Yaqin Sharqdagi muhim bazalari — Qatardagi Al-Udeyd, Kuvaytdagi Ali as-Salim, BAAdagi Al-Dafra hamda Bahrayndagi AQSH Beshinchi floti shtab-kvartirasiga raketalar uchirdi.
Eronning bir nechta zarbasi nishonga aniq yetib borgan. Tasdiqlanmagan ma’lumotlarga ko‘ra, Al-Udeyddagi bazada radar vayron bo‘lgan, Bahrayndagi bazada esa yong‘in yuzaga kelgan.
Ma’lum qilinishicha, Abu-Dabida bir kishi, Suriyaning Suvayda shahrida esa yana to‘rt kishi halok bo‘lgan. U yerda Isroilga qarab uchgan Eron raketasining parchalari qulagan.
Isroil axborot agentliklari Oyatulloh Ali Xomanaiy o‘ldirilganini da’vo qildi. Eron tashqi ishlar vaziri Abbos Aroqchi mamlakat oliy rahnamosi hamda prezident Mas’ud Pezeshkiyonning salomatligi haqidagi savolga javob berib, ular tirikligini aytdi.
Eron axborot agentliklari xabar berishicha, mamlakat janubidagi Xurmozgan viloyati Minab shahridagi qizlar uchun boshlang‘ich maktab zarbaga uchragan. Mahalliy prokuratura ma’lumotiga ko‘ra, kamida 85 kishi halok bo‘lgan, biroq ularning nechasi o‘quvchi ekani aniqlashtirilmagan. Bu ma’lumotlar mustaqil manbalar tomonidan tasdiqlanmagan. Ehtimol, zarba Minabdagi IIMK bazasiga qaratilgan bo‘lgan.
O‘zbekistonning Isroildagi elchixonasi bir kunda vatandoshlarga murojaat bilan chiqdi. Qayd etilishicha, qizil ogohlantirish — xavf borligini bildiradi va zudlik bilan boshpanaga kirish zarur, ko‘k ogohlantirish esa xavf o‘tganini va himoyalangan joyni tark etish mumkinligini anglatadi. “Har qanday holatda ham, rasmiy organlarning ko‘rsatmalariga rioya qiling va yaqin atrofdagi boshpana joylari haqida avvaldan ma’lumotga ega bo‘ling”, deyiladi axborotda.
Oʻzbekiston Tashqi ishlar vazirligi Yaqin Sharqdagi vaziyat yuzasidan tomonlarni harbiy qadamlardan tiyilishga chaqirdi. Vazirlik holat keskinlashayotganidan jiddiy xavotir bildirgan. “Vujudga kelgan inqirozni xalqaro huquq normalari asosida, siyosiy-diplomatik vositalar orqali va oʻzaro muloqot yoʻli bilan hal etish maqsadga muvofiq”, deyiladi TIV xabarida.
Kechga yaqin Eron Fors ko‘rfazidan Hind okeaniga chiqish yo‘li bo‘lgan, jahon neft tranzitining qariyb chorak qismi o‘tadigan Hormuz bo‘g‘ozini yopayotganini e’lon qildi. Islom respublikasi uni qanday to‘smoqchi ekani hozircha noma’lum: uning floti asosan kichik katerlardan iborat, AQSH esa zarurat tug‘ilganda bo‘g‘ozga yirik harbiy kemalarni kiritishi mumkin. Nazariy jihatdan Eron o‘tayotgan tankerlarga dronlar bilan hujum qilishi yoki bo‘g‘ozni minalashtirishi mumkin, ammo bu borada hozircha aniq ma’lumot yo‘q.
