“Bahouddin Naqshband” yodgorlik majmuasiga hisoblangan qo‘shimcha to‘lov yuzasidan “Buxoro hududiy elektr tarmoqlari korxonasi” AJga nisbatan ish qo‘zg‘atildi. Bu haqda Raqobat qo‘mitasi xabar berdi.
Ushbu yodgorlik majmuasi markazi tomonidan Raqobatni rivojlantirish va iste’molchilar huquqlarini himoya qilish qo‘mitasining Buxoro viloyati hududiy boshqarmasiga kelib tushgan murojaatda elektr tarmoqlari amalda belgilangan tarifga nisbatan qo‘shimcha to‘lov hisoblanayotganidan norozi bo‘lib, ushbu masalada amaliy yordam so‘ralgan.
Vazirlar Mahkamasining 2003-yil 22-avgustdagi 364-sonli qarorida O‘zbekiston hududidagi diniy tashkilotlar 2003-yil 1-sentyabrdan boshlab ularga ko‘rsatiladigan kommunal xizmatlarga to‘lovlarni aholi uchun belgilangan tariflar bo‘yicha to‘lashi ko‘rsatilgan.
Hududiy boshqarma tomonidan olib borilgan o‘rganishlar jarayonida, “Buxoro hududiy elektr tarmoqlari korxonasi” AJ tomonidan “Bahouddin Naqshband” yodgorlik majmuasi markaziga yetkazib berilgan elektr energiya uchun yuritilgan hisob-kitoblarda yuqoridagi qaror talablariga rioya qilmagan holda amalda belgilangan tariflarni oshirib qo‘llash natijasida majmuaga nisbatan 115 million so‘mlik qo‘shimcha to‘lov hisoblangani aniqlangan.
Shu munosabat bilan, boshqarma maxsus komissiyasi tomonidan qonunchilikda belgilangan tartibda “Hududiy elektr tarmoqlari korxonasi” AJning “Buxoro hududiy elektr tarmoqlari” AJga nisbatan belgilangan tartibda ish qo‘zg‘atildi.
Izoh (0)